LIBER ECCLESIASTES 5

₁ne temere quid loquaris

neque cor tuum sit velox ad proferendum sermonem coram Deo

Deus enim in caelo et tu super terram

idcirco sint pauci sermones tui

₂multas curas sequuntur somnia

et in multis sermonibus invenitur stultitia

₃si quid vovisti Deo ne moreris reddere

displicet enim ei infidelis et stulta promissio

sed quodcumque voveris redde

₄multoque melius est non vovere

quam post votum promissa non conplere

₅ne dederis os tuum ut peccare faciat carnem tuam

neque dicas coram angelo non est providentia

ne forte iratus Deus super sermone tuo

dissipet cuncta opera manuum tuarum

₆ubi multa sunt somnia plurimae vanitates et sermones

innumeri

tu vero Deum time

₇si videris calumnias egenorum et violenta iudicia

et subverti iustitiam in provincia

non mireris super hoc negotio

quia excelso alius excelsior est

et super hos quoque eminentiores sunt alii

₈et insuper universae terrae rex imperat servienti

₉avarus non implebitur pecunia

et qui amat divitias fructus non capiet ex eis

et hoc ergo vanitas

₁₀ubi multae sunt opes multi et qui comedant eas

et quid prodest possessori nisi quod cernit divitias oculis

suis

₁₁dulcis est somnus operanti sive parum sive multum comedat

saturitas autem divitis non sinit dormire eum

₁₂est et alia infirmitas pessima quam vidi sub sole

divitiae conservatae in malum domini sui

₁₃pereunt enim in adflictione pessima

generavit filium qui in summa egestate erit

₁₄sicut egressus est nudus de utero matris suae sic revertetur

et nihil auferet secum de labore suo

₁₅miserabilis prorsus infirmitas

quomodo venit sic revertetur

quid ergo prodest ei quod laboravit in ventum

₁₆cunctis diebus vitae suae comedit in tenebris

et in curis multis et in aerumna atque tristitia

₁₇hoc itaque mihi visum est bonum

ut comedat quis et bibat et fruatur laetitia

ex labore suo quod laboravit ipse sub sole

numerum dierum vitae suae quos dedit ei Deus

et haec est pars illius

₁₈et omni homini cui dedit Deus divitias atque substantiam

potestatemque ei tribuit ut comedat ex eis

et fruatur parte sua et laetetur de labore suo

hoc est donum Dei

₁₉non enim satis recordabitur dierum vitae suae

eo quod Deus occupet deliciis cor eius