LIBER DEUTERONOMII 33

₁haec est benedictio qua benedixit Moses homo Dei filiis Israhel ante mortem suam

₂et ait

Dominus de Sina venit et de Seir ortus est nobis

apparuit de monte Pharan et cum eo sanctorum milia

in dextera eius ignea lex

₃dilexit populos

omnes sancti in manu illius sunt

et qui adpropinquant pedibus eius accipient de doctrina illius

₄legem praecepit nobis Moses hereditatem multitudinis Iacob

₅erit apud rectissimum rex

congregatis principibus populi cum tribubus Israhel

₆vivat Ruben et non moriatur et sit parvus in numero

₇haec est Iudae benedictio

audi Domine vocem Iudae et ad populum suum introduc eum

manus eius pugnabunt pro eo

et adiutor illius contra adversarios eius erit

₈Levi quoque ait

perfectio tua et doctrina tua viro sancto tuo

quem probasti in Temptatione et iudicasti ad aquas Contradictionis

₉qui dixit patri suo et matri suae nescio vos

et fratribus suis ignoro illos

et nescierunt filios suos

hii custodierunt eloquium tuum

et pactum tuum servaverunt

₁₀iudicia tua o Iacob et legem tuam o Israhel

ponent thymiama in furore tuo et holocaustum super altare tuum

₁₁benedic Domine fortitudini eius et opera manuum illius suscipe

percute dorsa inimicorum eius et qui oderunt eum non consurgant

₁₂et Beniamin ait amantissimus Domini habitabit confidenter in eo

quasi in thalamo tota die morabitur et inter umeros illius requiescet

₁₃Ioseph quoque ait de benedictione Domini terra eius

de pomis caeli et rore atque abysso subiacente

₁₄de pomis fructuum solis ac lunae

₁₅de vertice antiquorum montium de pomis collium aeternorum

₁₆et de frugibus terrae et plenitudine eius

benedictio illius qui apparuit in rubo veniat super caput Ioseph

et super verticem nazarei inter fratres suos

₁₇quasi primogeniti tauri pulchritudo eius

cornua rinocerotis cornua illius

in ipsis ventilabit gentes usque ad terminos terrae

hae sunt multitudines Ephraim et haec milia Manasse

₁₈et Zabulon ait laetare Zabulon in exitu tuo

et Isachar in tabernaculis tuis

₁₉populos ad montem vocabunt

ibi immolabunt victimas iustitiae

qui inundationem maris quasi lac sugent

et thesauros absconditos harenarum

₂₀et Gad ait

benedictus in latitudine Gad quasi leo requievit

cepitque brachium et verticem

₂₁et vidit principatum suum quod in parte sua doctor esset repositus

qui fuit cum principibus populi

et fecit iustitias Domini et iudicium suum cum Israhel

₂₂Dan quoque ait Dan catulus leonis fluet largiter de Basan

₂₃et Nepthalim dixit Nepthalim abundantia perfruetur

et plenus erit benedictione

Domini

mare et meridiem possidebit

₂₄Aser quoque ait benedictus in filiis Aser

sit placens fratribus suis tinguat in oleo

pedem suum

₂₅ferrum et aes calciamentum eius

sicut dies iuventutis tuae ita et senectus tua

₂₆non est alius ut Deus rectissimi

ascensor caeli auxiliator tuus magnificentia eius discurrunt nubes

₂₇habitaculum eius sursum et subter brachia sempiterna

eiciet a facie tua inimicum dicetque conterere

₂₈habitabit Israhel confidenter et solus

oculus Iacob in terra frumenti et vini caelique caligabunt rore

₂₉beatus tu Israhel quis similis tui popule qui salvaris

in Domino scutum auxilii tui et gladius gloriae tuae

negabunt te inimici tui et tu eorum colla calcabis