LIBER DEUTERONOMII 2

₁profectique inde venimus in solitudinem quae ducit ad mare Rubrum

sicut mihi dixerat Dominus

et circumivimus montem Seir longo tempore

₂dixitque Dominus ad me

₃sufficit vobis circumire montem istum

ite contra aquilonem

₄et populo praecipe dicens

transibitis per terminos fratrum vestrorum filiorum Esau

qui habitant in Seir et timebunt vos

₅videte ergo diligenter ne moveamini contra eos

neque enim dabo vobis de terra eorum

quantum potest unius pedis calcare vestigium

quia in possessionem Esau dedi montem Seir

₆cibos emetis ab eis pecunia et comedetis

aquam emptam haurietis et bibetis

₇Dominus Deus tuus benedixit tibi in omni opere manuum tuarum

novit iter tuum quomodo transieris solitudinem hanc magnam per

quadraginta annos

habitans tecum Dominus Deus tuus et nihil tibi defuit

₈cumque transissemus fratres nostros filios Esau

qui habitabant in Seir

per viam campestrem de Helath et de Asiongaber

venimus ad iter quod ducit in desertum Moab

₉dixitque Dominus ad me

non pugnes contra Moabitas nec ineas adversum eos proelium

non enim dabo tibi quicquam de terra eorum

quia filiis Loth tradidi Ar in possessionem

₁₀Emim primi fuerunt habitatores eius

populus magnus et validus

et tam excelsus ut de Enacim stirpe

₁₁quasi gigantes crederentur

et essent similes filiorum Enacim

denique Moabitae appellant eos Emim

₁₂in Seir autem prius habitaverunt Horim

quibus expulsis atque deletis habitaverunt filii Esau

sicut fecit Israhel in terra possessionis suae

quam dedit ei Dominus

₁₃surgentes ergo ut transiremus torrentem Zared venimus ad eum

₁₄tempus autem quo ambulavimus de Cadesbarne usque ad transitum torrentis

Zared

triginta octo annorum fuit

donec consumeretur omnis generatio hominum bellatorum de castris

sicut iuraverat Dominus

₁₅cuius manus fuit adversum eos

ut interirent de castrorum medio

₁₆postquam autem universi ceciderunt pugnatores

₁₇locutus est Dominus ad me dicens

₁₈tu transibis hodie terminos Moab urbem nomine Ar

₁₉et accedens in vicina filiorum Ammon

cave ne pugnes contra eos nec movearis ad proelium

non enim dabo tibi de terra filiorum Ammon

quia filiis Loth dedi eam in possessionem

₂₀terra gigantum reputata est

et in ipsa olim habitaverunt gigantes

quos Ammanitae vocant Zomzommim

₂₁populus magnus et multus et procerae longitudinis

sicut Enacim quos delevit Dominus a facie eorum

et fecit illos habitare pro eis

₂₂sicut fecerat filiis Esau qui habitant in Seir

delens Horreos et terram eorum illis tradens

quam possident usque in praesens

₂₃Eveos quoque qui habitabant in Aserim usque Gazam

Cappadoces expulerunt

qui egressi de Cappadocia deleverunt eos

et habitaverunt pro illis

₂₄surgite et transite torrentem Arnon

ecce tradidi in manu tua Seon regem Esebon Amorreum

et terram eius

incipe possidere et committe adversum eum proelium

₂₅hodie incipiam mittere terrorem atque formidinem tuam

in populos qui habitant sub omni caelo

ut audito nomine tuo paveant

et in morem parturientium contremescant et dolore teneantur

₂₆misi ergo nuntios de solitudine Cademoth

ad Seon regem Esebon

verbis pacificis dicens

₂₇transibimus per terram tuam publica gradiemur via

non declinabimus neque ad dextram neque ad sinistram

₂₈alimenta pretio vende nobis ut vescamur

aquam pecunia tribue et sic bibemus

tantum est ut nobis concedas transitum

₂₉sicut fecerunt filii Esau qui habitant in Seir

et Moabitae qui morantur in Ar

donec veniamus ad Iordanem et transeamus in terram

quam Dominus Deus noster daturus est nobis

₃₀noluitque Seon rex Esebon dare nobis transitum

quia induraverat Dominus Deus tuus spiritum eius

et obfirmaverat cor illius

ut traderetur in manus tuas sicut nunc vides

₃₁dixitque Dominus ad me

ecce coepi tradere tibi Seon et terram eius

incipe possidere eam

₃₂egressusque est Seon obviam nobis

cum omni populo suo ad proelium in Iesa

₃₃et tradidit eum Dominus Deus noster nobis

percussimusque eum cum filiis et omni populo suo

₃₄cunctasque urbes in tempore illo cepimus

interfectis habitatoribus earum viris ac mulieribus et parvulis

non reliquimus in eis quicquam

₃₅absque iumentis quae in partem venere praedantium

et spoliis urbium quas cepimus

₃₆ab Aroer quae est super ripam torrentis Arnon

oppido quod in valle situm est usque Galaad

non fuit vicus et civitas quae nostras effugeret manus

omnes tradidit Dominus Deus noster nobis

₃₇absque terra filiorum Ammon ad quam non accessimus

et cunctis quae adiacent torrenti Ieboc

et urbibus montanis universisque locis

a quibus nos prohibuit Dominus Deus noster