Sachwissen

DANIHEL PROPHETA 3

₁Nabuchodonosor rex fecit statuam auream

altitudine cubitorum sexaginta

latitudine cubitorum sex

et statuit eam in campo Duram provinciae Babylonis

₂itaque Nabuchodonosor rex misit

ad congregandos satrapas magistratus et iudices

duces et tyrannos et praefectos omnesque principes regionum

ut convenirent ad dedicationem statuae

quam erexerat Nabuchodonosor rex

₃tunc congregati sunt satrapae magistratus et iudices

duces et tyranni et optimates qui erant in potestatibus constituti

et universi principes regionum

ut convenirent ad dedicationem statuae

quam erexerat Nabuchodonosor rex

stabant autem in conspectu statuae

quam posuerat Nabuchodonosor

₄et praeco clamabat valenter

vobis dicitur populis tribubus et linguis

₅in hora qua audieritis sonitum tubae et fistulae et citharae

sambucae et psalterii et symphoniae et universi generis musicorum

cadentes adorate statuam auream

quam constituit Nabuchodonosor rex

₆si quis autem non prostratus adoraverit

eadem hora mittetur in fornacem ignis ardentis

₇post haec igitur

statim ut audierunt omnes populi sonitum tubae fistulae et citharae

sambucae et psalterii et symphoniae et omnis generis musicorum

cadentes omnes populi et tribus et linguae

adoraverunt statuam auream

quam constituerat Nabuchodonosor rex

₈statimque et in ipso tempore

accedentes viri chaldei accusaverunt Iudaeos

₉dixeruntque Nabuchodonosor regi rex in aeternum vive

₁₀tu rex posuisti decretum

ut omnis homo qui audierit sonitum tubae fistulae et citharae

sambucae et psalterii et symphoniae et universi generis musicorum

prosternat se et adoret statuam auream

₁₁si quis autem non procidens adoraverit

mittatur in fornacem ignis ardentem

₁₂sunt ergo viri iudaei

quos constituisti super opera regionis Babyloniae

Sedrac Misac et Abdenago

viri isti contempserunt rex decretum tuum

deos tuos non colunt et statuam auream quam erexisti non adorant

₁₃tunc Nabuchodonosor in furore et in ira praecepit

ut adducerent Sedrac Misac et Abdenago

qui confestim adducti sunt in conspectu regis

₁₄pronuntiansque Nabuchodonosor rex ait eis

verene Sedrac Misac et Abdenago

deos meos non colitis

et statuam auream quam constitui non adoratis

₁₅nunc ergo si estis parati

quacumque hora audieritis sonitum tubae fistulae

citharae

sambucae psalterii et symphoniae

omnisque generis musicorum

prosternite vos et adorate statuam quam feci

quod si non adoraveritis

eadem hora mittemini in fornacem ignis ardentem

et quis est Deus qui eripiat vos de manu mea

₁₆respondentes Sedrac Misac et Abdenago

dixerunt regi Nabuchodonosor

non oportet nos de hac re respondere tibi

₁₇ecce enim Deus noster quem colimus

potest eripere nos de camino ignis ardentis

et de manibus tuis rex liberare

₁₈quod si noluerit notum tibi sit rex

quia deos tuos non colimus

et statuam auream quam erexisti non adoramus

₁₉tunc Nabuchodonosor repletus est furore

et aspectus faciei illius inmutatus est

super Sedrac Misac et Abdenago

et praecepit ut succenderetur fornax

septuplum quam succendi consuerat

₂₀et viris fortissimis de exercitu suo iussit

ut ligatis pedibus Sedrac Misac et Abdenago

mitterent eos in fornacem ignis ardentem

₂₁et confestim viri illi vincti

cum bracis suis et tiaris et calciamentis et vestibus

missi sunt in medium fornacis ignis ardentis

₂₂nam iussio regis urguebat fornax autem succensa erat nimis

porro viros illos qui miserant Sedrac Misac et Abdenago

interfecit flamma ignis

₂₃viri autem hii id est tres Sedrac Misac et

Abdenago

ceciderunt in medio camini ignis ardentis conligati

quae sequuntur in hebraicis voluminibus non repperi

₂₄÷ et ambulabant in medio flammae

÷ laudantes Deum et benedicentes Domino

₂₅÷ stans autem Azarias oravit sic

÷ aperiensque os suum in medio ignis ait

₂₆÷ benedictus es Domine Deus patrum nostrorum

÷ et laudabilis et gloriosum nomen tuum in saecula

₂₇÷ quia iustus es in omnibus quae fecisti nobis

÷ et universa opera tua vera et viae tuae rectae

÷ et omnia iudicia tua vera

₂₈÷ iudicia enim vera fecisti iuxta omnia quae induxisti super nos

÷ et super civitatem sanctam patrum nostrorum Hierusalem

÷ quia in veritate et in iudicio induxisti omnia haec

÷ propter peccata nostra

₂₉÷ peccavimus enim et inique egimus

÷ recedentes a te et deliquimus in omnibus

₃₀÷ et praecepta tua non audivimus nec observavimus

÷ nec fecimus sicut praeceperas nobis ut bene nobis esset

₃₁÷ omnia ergo quae induxisti super nos

÷ et universa quae fecisti nobis vero iudicio fecisti

₃₂÷ et tradidisti nos in manibus inimicorum iniquorum

÷ et pessimorum praevaricatorumque

÷ et regi iniusto et pessimo ultra omnem terram

₃₃÷ et nunc non possumus aperire os

÷ confusio et obprobrium facti sumus servis tuis et his qui colebant te

₃₄÷ ne quaesumus tradas nos in perpetuum propter nomen tuum

÷ et ne dissipes testamentum tuum

₃₅÷ neque auferas misericordiam tuam a nobis

÷ propter Abraham dilectum tuum

÷ et Isaac servum tuum et Israhel sanctum tuum

₃₆÷ quibus locutus es pollicens

÷ quod multiplicares semen eorum sicut stellas caeli

÷ et sicut harenam quae est in litore maris

₃₇÷ quia Domine inminuti sumus plus quam omnes gentes

÷ sumusque humiles in universa terra hodie propter peccata nostra

₃₈÷ et non est in tempore hoc princeps et propheta et dux

÷ neque holocaustum neque sacrificium

÷ neque oblatio neque incensum

÷ neque locus primitiarum coram te

₃₉÷ ut possimus invenire misericordiam

÷ sed in anima contrita et spiritu humilitatis

÷ suscipiamur

₄₀sicut in holocaustum arietum et taurorum

÷ et sicut in milibus agnorum pinguium

÷ sic fiat sacrificium nostrum in conspectu tuo hodie ut placeat tibi

÷ quoniam non est confusio confidentibus in te

₄₁÷ et nunc sequimur in toto corde et timemus te

÷ et quaerimus faciem tuam

₄₂ne confundas nos

÷ sed fac nobiscum iuxta mansuetudinem tuam

÷ et secundum multitudinem misericordiae tuae

₄₃÷ et erue nos in mirabilibus tuis

÷ et da gloriam nomini tuo Domine

₄₄÷ et confundantur omnes qui ostendunt servis tuis mala

÷ confundantur in omni potentia et robur eorum conteratur

₄₅÷ sciant quia tu Dominus Deus

solus

÷ et gloriosus super orbem terrarum

₄₆÷ et non cessabant qui inmiserant eos ministri

regis

÷ succendere fornacem naptha et stuppa et pice et malleolis

₄₇÷ et effundebatur flamma super fornacem cubitis quadraginta novem

₄₈÷ et erupit et incendit quos repperit iuxta fornacem de Chaldeis

₄₉÷ angelus autem descendit cum Azaria et sociis eius

in fornacem

÷ et excussit flammam ignis de fornace

₅₀÷ et fecit medium fornacis quasi ventum roris flantem

÷ et non tetigit eos omnino ignis

÷ neque contristavit nec quicquam molestiae intulit

₅₁÷ tunc tres quasi ex uno ore laudabant et glorificabant

÷ et benedicebant Deo in fornace dicentes

₅₂÷ benedictus es Domine Deus patrum nostrorum

÷ et laudabilis et superexaltatus in saecula

÷ et benedictum nomen gloriae tuae sanctum

÷ et laudabile et superexaltatum in omnibus saeculis

₅₃÷ benedictus es in templo sancto gloriae tuae

÷ et superlaudabilis et supergloriosus in saecula

₅₄÷ benedictus es in throno regni tui

÷ et superlaudabilis et superexaltatus in saecula

₅₅÷ benedictus es qui intueris abyssos et sedes super cherubin

÷ et laudabilis et superexaltatus in saecula

₅₆÷ benedictus es in firmamento caeli

÷ et laudabilis et gloriosus in saecula

₅₇÷ benedicite omnia opera Domini Domino