LIBER BARUCH 3

₁et nunc Domine omnipotens Deus Israhel

anima in angustiis et spiritus anxius clamat ad te

₂audi Domine et miserere quia Deus es misericors

et miserere nostri quia peccavimus ante te

₃quia tu sedes in sempiternum et nos peribimus in aevum

₄Domine omnipotens Deus Israhel

audi nunc orationem mortuorum Israhel et filiorum ipsorum

qui peccaverunt ante te et non audierunt vocem Domini Dei sui

et adglutinata sunt nobis mala

₅noli meminisse iniquitates patrum nostrorum

sed memento manus tuae et nominis tui in tempore isto

₆quia tu es Dominus Deus noster et laudabimus te Domine

₇quia propter hoc dedisti timorem tuum in cordibus nostris

et ut invocemus nomen tuum et laudemus te in captivitate nostra

quia convertemus iniquitatem patrum nostrorum

qui peccaverunt ante te

₈et ecce nos hodie in captivitate nostra sumus

quo nos dispersisti in inproperium et in maledictum et in

peccatum

secundum omnes iniquitates patrum nostrorum

qui discesserunt a te Domine Deus noster

₉audi Israhel mandata vitae

auribus percipite ut scias prudentiam

₁₀quid est Israhel quid est quod in terra es inimicorum

₁₁inveterasti in terra aliena coinquinatus es cum mortuis

deputatus es cum descendentibus in infernum

₁₂dereliquisti fontem sapientiae

₁₃si in via Dei ambulasses habitasses in pace

sempiterna

₁₄disce ubi sit prudentia ubi sit virtus ubi sit intellectus

ut scias simul ubi sit longiturnitas vitae et victus

ubi sit lumen oculorum et pax

₁₅quis invenit locum eius et quis intravit in thesauros eius

₁₆ubi sunt principes gentium

et qui dominantur super bestias quae sunt super terram

₁₇qui in avibus caeli inludunt

₁₈qui argentum thesaurizant

et aurum in quo confidebant homines

et non est finis adquisitionis eorum

qui argentum fabricant et solliciti sunt

nec est inventio operum illorum

₁₉exterminati sunt et ad inferos descenderunt

et alii loco eorum exsurrexerunt

₂₀iuvenes viderunt lumen et habitaverunt super terram

viam autem disciplinae ignoraverunt

₂₁neque intellexerunt semitas eius

neque filii eorum susceperunt eam

a facie ipsorum longe facta est

₂₂non est audita in terra Chanaan neque visa est in Theman

₂₃filii quoque Agar qui exquirunt prudentiam quae de terra est

negotiatores Merrae et Theman

et fabulatores et exquisitores intellegentiae

viam autem sapientiae nescierunt

neque commemorati sunt semitas eius

₂₄o Israhel quam magna est domus Dei

et ingens locus possessionis eius

₂₅magnus et non habet finem excelsus et inmensus

₂₆ibi fuerunt gigantes nominati illi qui ab initio fuerunt

statura magna scientes bellum

₂₇non hos elegit Deus

neque viam disciplinae dedit illis

et perierunt

₂₈eo quod non haberent

sapientiam

et perierunt propter insipientiam suam

₂₉quis ascendit in caelum et accepit eam

et deduxit eam de nubibus

₃₀quis transfretavit mare et invenit illam

et adtulit illam super aurum electum

₃₁non est qui possit scire viam eius

neque qui exquirat semitas eius

₃₂sed qui scit universa novit eam

et invenit eam prudentia sua

qui praeparavit terram in aeterno tempore

et replevit eam pecudibus et quadrupedibus

₃₃qui emittit lumen et vadit

et vocavit illud et obaudit illi in tremore

₃₄stellae autem lumen dederunt in custodiis suis et laetatae sunt

₃₅vocatae sunt et dixerunt adsumus

et luxerunt ei cum iucunditate qui fecit illas

₃₆hic Deus noster

non aestimabitur alius adversus eum

₃₇hic adinvenit omnem viam disciplinae

et tradidit illam Iacob puero suo et Israhel dilecto suo

₃₈post haec in terris visus est et cum hominibus conversatus est