LIBER BARUCH 4

₁hic liber mandatorum Dei et lex quae est in aeternum

omnes qui tenent eam ad vitam

qui autem dereliquerint eam in mortem

₂convertere Iacob et adprehende eam

ambula per viam ad splendorem eius contra lumen eius

₃ne tradas altero gloriam tuam

et dignitatem tuam genti alienae

₄beati sumus Israhel

quoniam quae Deo placent nobis manifesta sunt

₅animaequior esto populus Dei memorabilis Israhel

₆venundati estis gentibus non in perditionem

sed propter quod in ira ad iracundiam provocastis Deum

traditi estis adversariis

₇exacerbastis enim eum qui fecit vos Deum aeternum

immolantes daemoniis et non Deo

₈obliti autem estis eum qui nutrivit vos

et contristastis nutricem vestram Hierusalem

₉vidit enim iracundiam a Deo venientem vobis

et dixit audite confines Sion

adduxit enim mihi Deus luctum magnum

₁₀vidi enim captivitatem populi mei filiorum meorum et filiarum

quam superduxit illis Aeternus

₁₁nutrivi enim illos cum iucunditate

dimisi autem illos cum fletu et luctu

₁₂nemo gaudeat super me viduam et desolatam a multis

derelicta sum propter peccata filiorum meorum

quia declinaverunt a lege Dei

₁₃iustitias autem ipsius nescierunt

nec ambulaverunt per vias mandatorum Dei

neque per semitas veritatis eius cum iustitias ingressi sunt

₁₄veniant confines Sion

et memorentur captivitatem filiorum et filiarum mearum

quam superduxit illis Aeternus

₁₅adduxit enim super illos gentem de longinquo

gentem inprobam et alterius linguae

₁₆qui non sunt reveriti senem neque puerorum miserti sunt

et abduxerunt dilectos viduae et a filiis unicam desolaverunt

₁₇ego autem quid possum adiuvare vos

₁₈qui enim adduxit super vos mala

ipse vos eripiet de manibus inimicorum vestrorum

₁₉ambulate filii ambulate ego enim derelicta sum sola

₂₀exui me stola pacis indui autem me sacco obsecrationis

et clamabo ad Altissimum in diebus meis

₂₁animaequiores estote filii clamate ad Dominum

et eripiet vos de manu principum inimicorum

₂₂ego enim speravi in Aeternum salutem vestram

et venit mihi gaudium a Sancto

super misericordia quae veniet vobis ab Aeterno salutari nostro

₂₃emisi enim vos cum luctu et ploratu

reducet autem vos mihi Deus

cum gaudio et iucunditate in sempiternum

₂₄sicut enim viderunt vicinae Sion captivitatem vestram

sic videbunt et in celeritate salutem vestram a Deo

quae superveniet vobis cum honore magno et splendore aeterno

₂₅filii patienter sustinete iram quae supervenit vobis

persecutus est enim te inimicus tuus

sed cito videbis perditionem ipsius et super cervices ipsius ascendes

₂₆delicati mei ambulaverunt vias asperas

ducti sunt enim ut grex direptus ab inimicis

₂₇animaequiores estote filii et proclamate ad Deum

erit enim memoria vestra ab eo qui ducit vos

₂₈sicut enim fuit sensus vester ut erraretis a Deo

decies tantum iterum convertentes requiretis eum

₂₉qui enim induxit vobis mala

ipse rursum adducet vobis sempiternam iucunditatem

cum salute vestra

₃₀animaequior esto Hierusalem exhortatur enim te qui te nominavit

₃₁nocentes parebunt qui te vexaverunt

et qui gratulati sunt in tua ruina

punientur

₃₂civitates quibus servierunt filii tui

punietur quae accepit filios tuos

₃₃sicut enim gavisa est in tua ruina et laetata est in tuo casu

sic contristabitur in sua desolatione

₃₄et amputabitur exultatio multitudinis eius

et gaudimonium eius erit in luctum

₃₅ignis enim superveniet ei ab Aeterno in longiturnis diebus

et habitabitur a daemoniis in multitudinem temporis

₃₆circumspice Hierusalem ad orientem

et vide iucunditatem a Deo tibi venientem

₃₇ecce enim veniunt filii tui quos dimisisti dispersos

veniunt collecti ab oriente usque ad occidentem in verbo Sancti

gaudentes in honorem Dei