LIBER BARUCH 1

₁Et haec verba libri quae scripsit Baruch filius Neeri

filius Maasei

filii Sedechiae filii Sedei filii Helchiae in Babylonia

₂in anno quinto in septima die mensis

in tempore quo ceperunt Chaldei Hierusalem

et succenderunt eam igni

₃et legit Baruch verba libri huius

ad aures Iechoniae filii Ioachim regis Iuda

et ad aures universi populi venientis ad librum

₄et ad aures potentium filiorum regum

et ad aures presbyterorum

et ad aures populi a minimo usque ad magnum eorum

omnium habitantium in Babylonia ad flumen Sudi

₅qui audientes plorabant et ieiunabant

et orabant in conspectu Domini

₆et collegerunt pecuniam

secundum quod potuit uniuscuiusque manus

₇et miserunt in Hierusalem

ad Ioachim filium Helchiae filii Salom sacerdotem

et ad sacerdotes et ad omnem populum

qui inventi sunt cum eo in Hierusalem

₈cum acciperet vasa templi Domini quae ablata fuerant de templo

revocare in terram Iuda decima die illius sivan

vasa argentea quae fecit Sedechias filius Iosiae rex Iuda

₉posteaquam cepisset Nabuchodonosor rex Babylonum

Iechoniam

et principes et vinctos et potentes

et populum terrae ab Hierusalem

et duxit eos in Babyloniam

₁₀et dixerunt ecce misimus ad vos pecunias

de quibus emite holocaustomata et tus

et facite manna et offerte pro peccato ad aram Domini Dei nostri

₁₁et orate pro vita Nabuchodonosor regis Babyloniae

et pro vita Balthasar filii eius

ut sint dies ipsorum sicut dies caeli super terram

₁₂et det Dominus virtutem nobis et inluminet oculos nostros

ut vivamus sub umbra Nabuchodonosor regis Babyloniae

et sub umbra Balthasar filii eius

et serviamus eis multis diebus

et inveniamus gratiam in conspectu eorum

₁₃et pro nobis ipsis orate ad Dominum Deum nostrum

quia peccavimus Domino Deo nostro

et non est aversus furor eius a nobis usque in hunc diem

₁₄et legite librum istum quem misimus ad vos

recitari in templo Domini in die sollemni et in die oportuno

₁₅et dicetis

Domino Deo nostro iustitia nobis autem confusio faciei nostrae

sicut dies haec omni Iuda et habitantibus in Hierusalem

₁₆regibus nostris et principibus nostris

sacerdotibus nostris et prophetis nostris et patribus nostris

₁₇peccavimus ante Dominum nostrum

et non credidimus diffidentes in eum

₁₈et non fuimus subiectibiles illi

et non obaudivimus vocem Domini Dei nostri

ut ambularemus in mandatis eius quibus dedit nobis

₁₉a die qua eduxit patres nostros de terra Aegypti

usque in hunc diem

eramus incredibiles ad Dominum Deum nostrum

et dissipati recessimus ne audiremus vocem ipsius

₂₀et adheserunt nobis mala multa et maledictiones

quae constituit Dominus Moysi servo suo

qui eduxit patres nostros de terra Aegypti

dare nobis terram fluentem lac et mel sicut hodierna die

₂₁et non audivimus vocem Domini Dei nostri

secundum omnia verba prophetarum quos misit ad nos

₂₂et abivimus unusquisque in sensum cordis nostri maligni

operari diis alienis facientes mala ante oculos Domini Dei nostri