AMOS PROPHETA 2

₁haec dicit Dominus super tribus sceleribus Moab

et super quattuor non convertam eum

eo quod incenderit ossa regis Idumeae usque ad cinerem

₂et mittam ignem in Moab et devorabit aedes Carioth

et morietur in sonitu Moab in clangore tubae

₃et disperdam iudicem de medio eius

et omnes principes eius interficiam cum eo dicit Dominus

₄haec dicit Dominus super tribus sceleribus Iuda

et super quattuor non convertam eum

eo quod abiecerint legem Domini

et mandata eius non custodierint

deceperunt enim eos idola sua post quae abierant patres eorum

₅et mittam ignem in Iuda et devorabit aedes Hierusalem

₆haec dicit Dominus super tribus sceleribus Israhel

et super quattuor non convertam eum

pro eo quod vendiderit argento iustum

et pauperem pro calciamentis

₇qui conterunt super pulverem terrae capita pauperum

et viam humilium declinant

et filius ac pater eius ierunt ad puellam

ut violarent nomen sanctum meum

₈et super vestimentis pigneratis accubuerunt iuxta omne altare

et vinum damnatorum bibebant in domo Dei sui

₉ego autem exterminavi Amorreum a facie eorum

cuius altitudo cedrorum altitudo eius

et fortis ipse quasi quercus

et contrivi fructum eius desuper et radices eius subter

₁₀ego sum qui ascendere vos feci de terra Aegypti

et eduxi vos in deserto quadraginta annis

ut possideretis terram Amorrei

₁₁et suscitavi de filiis vestris in prophetas

et de iuvenibus vestris nazarenos

numquid non ita est filii Israhel dicit Dominus

₁₂et propinabatis nazarenis

vino

et prophetis mandabatis dicentes ne prophetetis

₁₃ecce ego stridebo super vos

sicut stridet plaustrum onustum faeno

₁₄et peribit fuga a veloce et fortis non obtinebit virtutem suam

et robustus non salvabit animam suam

₁₅et tenens arcum non stabit et velox pedibus suis non salvabitur

et ascensor equi non salvabit animam suam

₁₆et robustus corde inter fortes nudus fugiet in die illa

dicit Dominus