LIBER II MACCHABEORUM 1

₁Fratribus qui sunt per Aegyptum Iudaeis salutem dicunt

fratres qui sunt in Hierosolymis Iudaei

et qui in regione Iudaeae et pacem bonam

₂benefaciat vobis Deus et meminerit testamenti sui

quod est ad Abraham et Isaac et Iacob servorum suorum fidelium

₃et det vobis cor omnibus ut colatis eum

et faciatis eius voluntatem corde magno et animo volente

₄adaperiat cor vestrum in lege sua et in praeceptis eius

et faciat pacem

₅exaudiat orationes vestras et reconcilietur vobis

nec vos deserat in tempore malo

₆et nunc hic sumus orantes pro vobis

₇regnante Demetrio anno centesimo sexagesimo

nono

nos Iudaei scripsimus vobis

in tribulatione et impetu qui supervenit nobis in istis annis

ex quo recessit Iason a sancta terra et a regno

₈portam succenderunt et effuderunt sanguinem innocentem

et oravimus ad Dominum et exauditi sumus

et obtulimus sacrificium et similaginem

et accendimus lucernas et proposuimus panes

₉et nunc frequentate dies scenophegiae mensis casleu

₁₀anno centesimo octogesimo octavo

populus qui est Hierosolymis et in Iudaea senatusque et

Iudas

Aristobolo magistro Ptolomei regis

qui est de genere christorum sacerdotum

et his qui in Aegypto sunt Iudaeis salutem et sanitatem

₁₁de magnis periculis a Deo liberati

magnifice gratias ipsi utpote qui adversus talem regem dimicavimus

₁₂ipse enim ebullire fecit de Perside eos

qui pugnaverunt contra nos

₁₃nam cum in Perside esset

dux ipse et cum ipso inmensus exercitus cecidit in templo Naneae

consilio deceptus sacerdotis Naneae

₁₄ut enim cum ea habitaturus venit ad locum

Antiochus et amici eius

et ut acciperet pecunias multas dotis nomine

₁₅cumque proposuissent eas sacerdotes Naneae

et ipse cum paucis ingressus esset intra ambitum fani

clauserunt templum

₁₆cum intrasset Antiochus

apertoque occulto aditu templi

mittentes lapides percusserunt ducem et qui cum eo erant

et diviserunt membratim et capitibus amputatis foras proiecerunt

₁₇per omnia benedictus Deus qui tradidit impios

₁₈facturi igitur quinta et vicesima mensis casleu

purificationem templi

necessarium duximus significare vobis

ut vos quoque agatis diem scenophegiae

et diem ignis qui datus est

quando Neemias aedificato templo et altari obtulit sacrificia

₁₉nam cum in Persidem ducerentur patres nostri

sacerdotes qui tunc Dei cultores erant

acceptum ignem de altario occulte absconderunt in valle

ubi erat puteus altus siccus

et in eo contutati sunt eum ita ut omnibus ignotus esset locus

₂₀cum praeterissent autem multi anni

et placuit Deo ut mitteretur Neemias a rege Persidis

nepotes sacerdotum illorum qui absconderant

misit ad requirendum ignem

et sicut narraverunt nobis

non invenerunt ignem sed aquam crassam

₂₁et iussit eos haurire et adferre sibi

et sacrificia quae inposita erant iussit sacerdos Neemias

aspargi aqua ipsa

et ligna et quae erant superposita

₂₂utque hoc factum est

et tempus adfuit quo sol refulsit qui prius erat in nubilo

accensus est ignis magnus ita ut omnes mirarentur

₂₃orationem autem faciebant omnes sacerdotes

dum consummaretur sacrificium

Ionatha inchoante ceteris autem respondentibus

₂₄et Neemiae erat oratio hunc habens modum

Domine Deus omnium creator

terribilis et fortis iustus et misericors

qui solus es rex bonus

₂₅solus praestans solus iustus et omnipotens et aeternus

qui liberas Israhel de omni malo

qui fecisti patres electos et sanctificasti eos

₂₆accipe sacrificium pro universo populo tuo Israhel

et custodi partem tuam et sanctifica

₂₇congrega dispersionem nostram libera eos qui serviunt gentibus

contemptos et abominatos respice

ut sciant gentes quod tu es Deus noster

₂₈adflige opprimentes

et contumeliam facientes in superbia

₂₉constitue populum tuum in loco sancto tuo sicut dixit Moses

₃₀sacerdotes autem psallebant hymnos

usquequo consumptum esset sacrificium

₃₁cum autem consummatum fuisset sacrificium

ex residua aqua Neemias iussit lapides maiores perfundi

₃₂quod ut factum est flamma ex eis accensa est

sed ex lumine quod refulsit ab altari consumpta est

₃₃ut vero manifestata essent haec

renuntiatum est regi Persarum

quod in loco in quo ignem absconderant hii qui translati erant sacerdotes

aqua apparuit de qua Neemias et qui cum eo erant purificaverunt

sacrificia

₃₄considerans autem rex et rem diligenter examinans

fecit ei templum

₃₅et si quibus donaverat rex multa bona

accipiebat ex hoc et tribuebat

₃₆appellavit autem Neemias hoc Nepthar

quod interpretatur purificatio

vocatur autem apud plures Nephi