VERBA DIERUM II 13

₁anno octavodecimo regis Hieroboam regnavit Abia super Iudam

₂tribus annis regnavit in Hierusalem

nomenque matris eius Michaia filia Urihel de Gabaa

et erat bellum inter Abia et Hieroboam

₃cumque inisset Abia certamen

et haberet bellicosissimos viros et electorum quadringenta milia

Hieroboam instruxit e contra aciem octingenta milia

virorum

qui et ipsi electi erant et ad bella fortissimi

₄stetit igitur Abia super montem Someron qui erat in Ephraim

et ait audi Hieroboam et omnis Israhel

₅num ignoratis quod Dominus Deus Israhel dederit regnum David

super Israhel in sempiternum

ipsi et filiis eius pactum salis

₆et surrexit Hieroboam filius Nabath servus Salomonis filii David

et rebellavit contra dominum suum

₇congregatique sunt ad eum viri vanissimi et filii Belial

et praevaluerunt contra Roboam filium Salomonis

porro Roboam erat rudis et corde pavido nec potuit resistere eis

₈nunc ergo vos dicitis

quod resistere possitis regno Domini quod possidet per filios David

habetisque grandem populi multitudinem

atque vitulos aureos quos fecit vobis Hieroboam in deos

₉et eiecistis sacerdotes Domini filios Aaron atque Levitas

et fecistis vobis sacerdotes sicut omnes populi terrarum

quicumque venerit et initiaverit manum suam

in tauro in bubus et in arietibus septem

fit sacerdos eorum qui non sunt dii

₁₀noster autem Dominus Deus est quem non relinquimus

sacerdotesque ministrant Domino

de filiis Aaron et Levitae sunt in ordine suo

₁₁holocausta quoque offerunt Domino per singulos dies mane et vespere

et thymiama iuxta legis praecepta confectum

et proponuntur panes in mensa mundissima

estque apud nos candelabrum aureum et lucernae eius

ut accendantur semper ad vesperam

nos quippe custodimus praecepta Domini Dei nostri

quem vos reliquistis

₁₂ergo in exercitu nostro dux Deus est

et sacerdotes eius qui clangunt tubis et resonant contra vos

filii Israhel nolite pugnare contra Dominum Deum patrum vestrorum

quia non vobis expedit

₁₃haec illo loquente Hieroboam retro moliebatur insidias

cumque ex adverso hostium staret

ignorantem Iudam suo ambiebat exercitu

₁₄respiciensque Iudas vidit instare bellum ex adverso

et post tergum

et clamavit ad Dominum

ac sacerdotes tubis canere coeperunt

₁₅omnesque viri Iuda vociferati sunt

et ecce illis clamantibus perterruit Deus Hieroboam

et omnem Israhel qui stabat ex adverso Abia et Iuda

₁₆fugeruntque filii Israhel Iudam

et tradidit eos Deus in manu eorum

₁₇percussit ergo eos Abia et populus eius plaga magna

et corruerunt vulnerati ex Israhel

quingenta milia virorum fortium

₁₈humiliatique sunt filii Israhel in tempore illo

et vehementissime confortati filii Iuda

eo quod sperassent in Domino Deo patrum suorum

₁₉persecutus est autem Abia fugientem Hieroboam

et cepit civitates eius

Bethel et filias eius et Hiesena cum filiabus suis

Ephron quoque et filias eius

₂₀nec valuit ultra resistere Hieroboam in diebus Abia

quem percussit Dominus et mortuus est

₂₁igitur Abia confortato imperio suo accepit uxores quattuordecim

procreavitque viginti duos

filios

et sedecim filias

₂₂reliqua autem sermonum Abia viarumque et operum eius

scripta sunt diligentissime in libro prophetae Addo