LIBER EZRAE III 7

₁Tunc Sisennes, subregulus Coelensyriae et Foenicen, et Satrabozanes et sodales eius obsecuti his quae a Dario rege decreta erant, ₂insistebant sacrosanctis operibus diligentissime cooperantes cum senioribus Iudaeorum, principibus Syriae. ₃Et prosperata sunt sacrosancta opera prophetantibus Aggeo et Zaccharia prophetis. ₄Et consummaverunt ea per praeceptum Domini Dei Israhel et ex consilio Cyri et Darii et Artaxersis regis Persarum. ₅Et consummata est domus sancta usque ad tertiam et vicesimam diem mensis adar, sexto anno Darii regis. ₆Et fecerunt filii Israhel et sacerdotes et Levitae et ceteri qui erant ex captivitate, qui adpositi sunt, secundum ea quae scripta sunt in libro Moysi. ₇Et obtulerunt in dedicatione templi Domini tauros centum, arietes ducentos, agnos quadringentos, ₈et hedos pro peccatis universi Israhel duodecim secundum numerum tribuum Israhel. ₉Et steterunt sacerdotes et Levitae amicti stolis per tribus super opera Domini Dei Israhel secundum librum Moysi, et ostiarii per singulas ianuas.

₁₀Et egerunt filii Israhel cum his qui erant ex captivitate illud phase quartadecima luna mensis primi, quando sanctificati sunt sacerdotes et Levitae. ₁₁Et omnes filii captivitatis non sunt simul sanctificati, quia Levitae simul omnes sanctificati sunt ₁₂et immolaverunt phase universis filiis captivitatis et fratribus suis sacerdotibus et sibimet ipsis. ₁₃Et manducaverunt filii Israhel qui erant ex captivitate, omnes qui recesserant ab omnibus execrationibus gentium terrae quaerentes Dominum, ₁₄et celebraverunt diem festum azymorum septem diebus, epulantes in conspectu Domini, ₁₅quoniam convertit consilium regis Assyriorum in eis, confortare manus eorum ad opera manus Domini Dei Israhel.