VERBA DIERUM I 24

₁porro filiis Aaron hae partitiones erunt

filii Aaron Nadab et Abiu et Eleazar et Ithamar

₂mortui sunt autem Nadab et Abiu ante patrem suum absque liberis

sacerdotioque functus est Eleazar et Ithamar

₃et divisit eos David

id est Sadoc de filiis Eleazar et Ahimelech de filiis Ithamar

secundum vices suas et ministerium

₄inventique sunt multo plures filii Eleazar in principibus viris

quam filii Ithamar

divisit autem eis hoc est filiis Eleazar

principes per familias sedecim

et filiis Ithamar per familias et domos suas octo

₅porro divisit utrasque inter se familias sortibus

erant enim principes sanctuarii et principes Dei

tam de filiis Eleazar quam de filiis Ithamar

₆descripsitque eos Semeias filius Nathanahel scriba Levites

coram rege et principibus et Sadoc sacerdote et Ahimelech filio Abiathar

principibus quoque familiarum sacerdotalium et leviticarum

unam domum quae ceteris praeerat Eleazar

et alteram domum quae sub se habebat ceteros Ithamar

₇exivit autem sors prima Ioiarib secunda Iedeiae

₈tertia Arim quarta Seorim

₉quinta Melchia sexta Maiman

₁₀septima Accos octava Abia

₁₁nona Hiesu decima Sechenia

₁₂undecima Eliasib duodecima Iacim

₁₃tertiadecima Oppa quartadecima Isbaal

₁₄quintadecima Belga

sextadecima Emmer

₁₅septimadecima Ezir

octavadecima Hapses

₁₆nonadecima Phetheia vicesima Iezecel

₁₇vicesima prima Iachin vicesima secunda Gamul

₁₈vicesima tertia Dalaiau vicesima quarta Mazziau

₁₉hae vices eorum secundum ministeria sua

ut ingrediantur domum Domini

et iuxta ritum suum sub manu Aaron patris eorum

sicut praecepit Dominus Deus Israhel

₂₀porro filiorum Levi qui reliqui fuerant

de filiis Amram erat Subahel

et filiis Subahel Iedeia

₂₁de filiis quoque Roobiae princeps Iesias

₂₂Isaaris vero Salemoth filiusque Salemoth Iaath

₂₃filiusque eius Ieriahu Amarias secundus

Iazihel tertius Iecmaam quartus

₂₄filius Ozihel Micha filius Micha Samir

₂₅frater Micha Iesia

filiusque Iesiae Zaccharias

₂₆filii Merari Mooli et Musi

filius Ioziau Benno

₂₇filius quoque Merari Oziau et Soem et Zacchur et Hebri

₂₈porro Mooli filius Eleazar qui non habebat liberos

₂₉filius vero Cis Ierahemel

₃₀filii Musi Mooli Eder et Ierimoth

isti filii Levi secundum domos familiarum suarum

₃₁miseruntque et ipsi sortes contra fratres suos filios Aaron

coram David rege et Sadoc et Ahimelech

et principibus familiarum sacerdotalium et leviticarum

tam maiores quam minores omnes sors aequaliter dividebat