SIRACIDES 27

₁χάριν διαφόρου πολλοὶ ἥμαρτον,

καὶ ὁ ζητῶν πληθῦναι ἀποστρέψει ὀφθαλμόν.

₂ἀνὰ μέσον ἁρμῶν λίθων παγήσεται πάσσαλος,

καὶ ἀνὰ μέσον πράσεως καὶ ἀγορασμοῦ συντριβήσεται ἁμαρτία.

₃ἐὰν μὴ ἐν φόβῳ κυρίου κρατήσῃ κατὰ σπουδήν,

ἐν τάχει καταστραφήσεται αὐτοῦ ὁ οἶκος.

₄Ἐν σείσματι κοσκίνου διαμένει κοπρία,

οὕτως σκύβαλα ἀνθρώπου ἐν λογισμῷ αὐτοῦ.

₅σκεύη κεραμέως δοκιμάζει κάμινος,

καὶ πειρασμὸς ἀνθρώπου ἐν διαλογισμῷ αὐτοῦ.

₆γεώργιον ξύλου ἐκφαίνει ὁ καρπὸς αὐτοῦ,

οὕτως λόγος ἐνθυμήματος καρδίας ἀνθρώπου.

₇πρὸ λογισμοῦ μὴ ἐπαινέσῃς ἄνδρα·

οὗτος γὰρ πειρασμὸς ἀνθρώπων.

₈Ἐὰν διώκῃς τὸ δίκαιον, καταλήμψῃ

καὶ ἐνδύσῃ αὐτὸ ὡς ποδήρη δόξης.

₉πετεινὰ πρὸς τὰ ὅμοια αὐτοῖς καταλύσει,

καὶ ἀλήθεια πρὸς τοὺς ἐργαζομένους αὐτὴν ἐπανήξει.

₁₀λέων θήραν ἐνεδρεύει,

οὕτως ἁμαρτία ἐργαζομένους ἄδικα.

₁₁διήγησις εὐσεβοῦς διὰ παντὸς σοφία,

ὁ δὲ ἄφρων ὡς σελήνη ἀλλοιοῦται.

₁₂εἰς μέσον ἀσυνέτων συντήρησον καιρόν,

εἰς μέσον δὲ διανοουμένων ἐνδελέχιζε.

₁₃διήγησις μωρῶν προσόχθισμα,

καὶ ὁ γέλως αὐτῶν ἐν σπατάλῃ ἁμαρτίας.

₁₄λαλιὰ πολυόρκου ἀνορθώσει τρίχας,

καὶ ἡ μάχη αὐτῶν ἐμφραγμὸς ὠτίων.

₁₅ἔκχυσις αἵματος μάχη ὑπερηφάνων,

καὶ ἡ διαλοιδόρησις αὐτῶν ἀκοὴ μοχθηρά.

₁₆Ὁ ἀποκαλύπτων μυστήρια ἀπώλεσεν πίστιν

καὶ οὐ μὴ εὕρῃ φίλον πρὸς τὴν ψυχὴν αὐτοῦ.

₁₇στέρξον φίλον καὶ πιστώθητι μετ᾽ αὐτοῦ·

ἐὰν δὲ ἀποκαλύψῃς τὰ μυστήρια αὐτοῦ, μὴ καταδιώξῃς ὀπίσω αὐτοῦ.

₁₈καθὼς γὰρ ἀπώλεσεν ἄνθρωπος τὸν νεκρὸν αὐτοῦ,

οὕτως ἀπώλεσας τὴν φιλίαν τοῦ πλησίον·

₁₉καὶ ὡς πετεινὸν ἐκ χειρός σου ἀπέλυσας,

οὕτως ἀφῆκας τὸν πλησίον καὶ οὐ θηρεύσεις αὐτόν.

₂₀μὴ αὐτὸν διώξῃς, ὅτι μακρὰν ἀπέστη

καὶ ἐξέφυγεν ὡς δορκὰς ἐκ παγίδος.

₂₁ὅτι τραῦμα ἔστιν καταδῆσαι,

καὶ λοιδορίας ἔστιν διαλλαγή,

ὁ δὲ ἀποκαλύψας μυστήρια ἀφήλπισεν.

₂₂Διανεύων ὀφθαλμῷ τεκταίνει κακά,

καὶ οὐδεὶς αὐτὰ ἀποστήσει ἀπ᾽ αὐτοῦ·

₂₃ἀπέναντι τῶν ὀφθαλμῶν σου γλυκανεῖ τὸ στόμα αὐτοῦ

καὶ ἐπὶ τῶν λόγων σου ἐκθαυμάσει,

ὕστερον δὲ διαστρέψει τὸ στόμα αὐτοῦ

καὶ ἐν τοῖς λόγοις σου δώσει σκάνδαλον.

₂₄πολλὰ ἐμίσησα καὶ οὐχ ὡμοίωσα αὐτῷ,

καὶ ὁ κύριος μισήσει αὐτόν.

₂₅ὁ βάλλων λίθον εἰς ὕψος ἐπὶ κεφαλὴν αὐτοῦ βάλλει,

καὶ πληγὴ δολία διελεῖ τραύματα.

₂₆ὁ ὀρύσσων βόθρον εἰς αὐτὸν ἐμπεσεῖται,

καὶ ὁ ἱστῶν παγίδα ἐν αὐτῇ ἁλώσεται.

₂₇ὁ ποιῶν πονηρά, εἰς αὐτὸν κυλισθήσεται,

καὶ οὐ μὴ ἐπιγνῷ πόθεν ἥκει αὐτῷ.

₂₈ἐμπαιγμὸς καὶ ὀνειδισμὸς ὑπερηφάνῳ,

καὶ ἡ ἐκδίκησις ὡς λέων ἐνεδρεύσει αὐτόν.

₂₉παγίδι ἁλώσονται οἱ εὐφραινόμενοι πτώσει εὐσεβῶν,

καὶ ὀδύνη καταναλώσει αὐτοὺς πρὸ τοῦ θανάτου αὐτῶν.

₃₀Μῆνις καὶ ὀργή, καὶ ταῦτά ἐστιν βδελύγματα,

καὶ ἀνὴρ ἁμαρτωλὸς ἐγκρατὴς ἔσται αὐτῶν.