PSALMI IUXTA LXX 57

₂Si vere utique iustitiam loquimini recta iudicate filii hominum

₃etenim in corde iniquitates operamini in terra

iniustitiam manus vestrae concinnant

₄alienati sunt peccatores a vulva

erraverunt ab utero locuti sunt falsa

₅furor illis secundum similitudinem serpentis

sicut aspidis surdae et obturantis aures suas

₆quae non exaudiet vocem incantantium

et venefici incantantis sapienter

₇Deus conteret dentes eorum in ore ipsorum

molas leonum confringet Dominus

₈ad nihilum devenient tamquam aqua decurrens

intendit arcum suum donec infirmentur

₉sicut cera quae fluit auferentur

supercecidit ignis et non viderunt solem

₁₀priusquam intellegerent spinae vestrae ramnum

sicut viventes sicut in ira absorbet vos

₁₁laetabitur iustus cum viderit vindictam

manus suas lavabit in sanguine peccatoris

₁₂et dicet homo si utique est fructus iusto

utique est Deus iudicans eos in terra