PSALMI IUXTA LXX 51

₃Quid gloriatur in malitia qui potens est iniquitate

₄tota die iniustitiam cogitavit lingua tua

sicut novacula acuta fecisti dolum

₅dilexisti malitiam super benignitatem

iniquitatem magis quam loqui aequitatem diapsalma

₆dilexisti omnia verba praecipitationis linguam dolosam

₇propterea Deus destruet te in finem

evellet te et emigrabit te de tabernaculo

et radicem tuam de terra viventium diapsalma

₈videbunt iusti et timebunt et super eum ridebunt et dicent

₉ecce homo qui non posuit Deum adiutorem suum

sed speravit in multitudine divitiarum suarum

et praevaluit in vanitate sua

₁₀ego autem sicut oliva fructifera in domo Dei

speravi in misericordia Dei in aeternum et in saeculum saeculi

₁₁confitebor tibi in saeculum quia fecisti

et expectabo nomen tuum quoniam bonum

in conspectu sanctorum tuorum