PSALMI IUXTA LXX 38

₂Dixi custodiam vias meas ut non delinquam in lingua mea

posui ori meo custodiam cum consisteret peccator adversum me

₃obmutui et humiliatus sum et silui a bonis

et dolor meus renovatus est

₄concaluit cor meum intra me

et in meditatione mea exardescet ignis

₅locutus sum in lingua mea notum fac mihi Domine finem meum

et numerum dierum meorum quis est ut sciam quid desit mihi

₆ecce mensurabiles posuisti dies meos

et substantia mea tamquam nihilum ante te

verumtamen universa vanitas omnis homo vivens diapsalma

₇verumtamen in imagine pertransit homo

sed et frustra conturbatur

thesaurizat et ignorat cui congregabit ea

₈et nunc quae est expectatio mea nonne Dominus

et substantia mea apud te est

₉ab omnibus iniquitatibus meis erue me

obprobrium insipienti dedisti me

₁₀obmutui ÷et: non aperui os meum quoniam tu fecisti

₁₁amove a me plagas tuas

₁₂a fortitudine manus tuae ego defeci

in increpationibus propter iniquitatem corripuisti hominem

et tabescere fecisti sicut araneam animam eius

verumtamen vane ÷conturbatur: omnis homo diapsalma

₁₃exaudi orationem meam Domine et deprecationem meam

auribus percipe lacrimas meas

ne sileas quoniam advena sum apud te et peregrinus

sicut omnes patres mei

₁₄remitte mihi ut refrigerer priusquam abeam et amplius non ero