PSALMI IUXTA LXX 36

Noli aemulari in malignantibus

neque zelaveris facientes iniquitatem

₂quoniam tamquam faenum velociter arescent

et quemadmodum holera herbarum cito decident

₃spera in Domino et fac bonitatem

et inhabita terram et pasceris in divitiis eius

₄delectare in Domino et dabit tibi petitiones cordis tui

₅revela Domino viam tuam et spera in eum et ipse faciet

₆et educet quasi lumen iustitiam tuam

et iudicium tuum tamquam meridiem

₇subditus esto Domino et ora eum

noli aemulari in eo qui prosperatur in via sua

in homine faciente iniustitias

₈desine ab ira et derelinque furorem noli aemulari ut maligneris

₉quoniam qui malignantur exterminabuntur

sustinentes autem Dominum ipsi hereditabunt terram

₁₀et adhuc pusillum et non erit peccator

et quaeres locum eius et non invenies

₁₁mansueti autem hereditabunt terram

et delectabuntur in multitudine pacis

₁₂observabit peccator iustum et stridebit super eum dentibus suis

₁₃Dominus autem inridebit eum

quia prospicit quoniam veniet dies eius

₁₄gladium evaginaverunt peccatores intenderunt arcum suum

ut decipiant pauperem et inopem

ut trucident rectos corde

₁₅gladius eorum intret in corda ipsorum

et arcus ipsorum confringatur

₁₆melius est modicum iusto super divitias peccatorum multas

₁₇quoniam brachia peccatorum conterentur

confirmat autem iustos Dominus

₁₈novit Dominus dies inmaculatorum

et hereditas eorum in aeternum erit

₁₉non confundentur in tempore malo et in diebus famis saturabuntur

₂₀quia peccatores peribunt

inimici vero Domini mox honorificati fuerint et exaltati

deficientes quemadmodum fumus defecerunt

₂₁mutuabitur peccator et non solvet

iustus autem miseretur et tribuet

₂₂quia benedicentes ei hereditabunt terram

maledicentes autem ei disperibunt

₂₃apud Dominum gressus hominis dirigentur et viam eius volet

₂₄cum ceciderit non conlidetur

quia Dominus subponit manum suam

₂₅iunior fui et senui et non vidi iustum derelictum

nec semen eius quaerens panes

₂₆tota die miseretur et commodat

et semen illius in benedictione erit

₂₇declina a malo et fac bonum et inhabita in saeculum saeculi

₂₈quia Dominus amat iudicium et non derelinquet sanctos suos

in aeternum conservabuntur

iniusti punientur et semen impiorum peribit

₂₉iusti autem hereditabunt terram

et inhabitabunt in saeculum ÷saeculi: super eam

₃₀os iusti meditabitur sapientiam et lingua eius loquetur iudicium

₃₁lex Dei eius in corde ipsius et non subplantabuntur gressus eius

₃₂considerat peccator iustum et quaerit mortificare eum

₃₃Dominus autem non derelinquet eum in manus eius

nec damnabit eum cum iudicabitur illi

₃₄expecta Dominum et custodi viam eius

et exaltabit te ut hereditate capias terram

cum perierint peccatores videbis

₃₅vidi impium superexaltatum et elevatum sicut cedros Libani

₃₆et transivi et ecce non erat

et quaesivi eum et non est inventus locus eius

₃₇custodi innocentiam et vide aequitatem

quoniam sunt reliquiae homini pacifico

₃₈iniusti autem disperibunt simul

reliquiae impiorum peribunt

₃₉salus autem iustorum a Domino

et protector eorum in tempore tribulationis

₄₀et adiuvabit eos Dominus et liberabit eos

et eruet eos a peccatoribus

et salvabit eos quia speraverunt in eo