PSALMI IUXTA LXX 17

₂Diligam te Domine fortitudo mea

₃Dominus firmamentum meum et refugium meum et liberator meus

Deus meus adiutor meus et sperabo in eum

protector meus et cornu salutis meae et susceptor meus

₄laudans invocabo Dominum et ab inimicis meis salvus ero

₅circumdederunt me dolores mortis

et torrentes iniquitatis conturbaverunt me

₆dolores inferni circumdederunt me

praeoccupaverunt me laquei mortis

₇cum tribularer invocavi Dominum

et ad Deum meum clamavi

exaudivit de templo ÷sancto: suo vocem meam

et clamor meus in conspectu eius introibit in aures eius

₈et commota est et contremuit terra

et fundamenta montium conturbata sunt

et commota sunt quoniam iratus est eis

₉ascendit fumus in ira eius et ignis a facie eius exarsit

carbones succensi sunt ab eo

₁₀inclinavit caelos et descendit et caligo sub pedibus eius

₁₁et ascendit super cherubin et volavit volavit super pinnas ventorum

₁₂et posuit tenebras latibulum suum

in circuitu eius tabernaculum eius

tenebrosa aqua in nubibus aeris

₁₃prae fulgore in conspectu eius nubes ※eius:

transierunt

grando et carbones ignis

₁₄et intonuit de caelo Dominus et Altissimus dedit vocem suam

※grando et carbones ignis:

₁₅et misit sagittas et dissipavit eos

et fulgora multiplicavit et conturbavit eos

₁₆et apparuerunt fontes aquarum

et revelata sunt fundamenta orbis terrarum

ab increpatione tua Domine ab inspiratione spiritus irae tuae

₁₇misit de summo et accepit me

adsumpsit me de aquis multis

₁₈eripiet me de inimicis meis fortissimis

et ab his qui oderunt me quoniam confirmati sunt

super me

₁₉praevenerunt me in die adflictionis meae

et factus est Dominus protector meus

₂₀et eduxit me in latitudinem

salvum me faciet quoniam voluit me

₂₁÷et: retribuet mihi Dominus secundum iustitiam meam

÷et: secundum puritatem manuum mearum retribuet mihi

₂₂quia custodivi vias Domini nec impie gessi a Deo meo

₂₃quoniam omnia iudicia eius in conspectu meo sunt

et iustitias eius non reppuli a me

₂₄et ero inmaculatus cum eo

et observabo ab iniquitate mea

₂₅et retribuet mihi Dominus secundum iustitiam meam

et secundum puritatem manuum mearum

in conspectu oculorum eius

₂₆cum sancto sanctus eris et cum viro innocente innocens eris

₂₇et cum electo electus eris

et cum perverso perverteris

₂₈quoniam tu populum humilem salvum facies

et oculos superborum humiliabis

₂₉quoniam tu inluminas lucernam meam Domine

Deus meus inluminas tenebras meas

₃₀quoniam in te eripiar a temptatione

et in Deo meo transgrediar murum

₃₁Deus meus inpolluta via eius eloquia Domini igne examinata

protector est omnium sperantium in eum

₃₂quoniam quis deus praeter Dominum

et quis deus praeter Deum nostrum

₃₃Deus qui praecingit me virtute

et posuit inmaculatam viam meam

₃₄qui perfecit pedes meos tamquam cervorum

et super excelsa statuens me

₃₅qui doces manus meas in proelium

et posuisti arcum aereum brachia mea

₃₆et dedisti mihi protectionem salutis tuae

et dextera tua suscepit me

et disciplina tua correxit me in finem

et disciplina tua ipsa me docebit

₃₇dilatasti gressus meos subtus me

et non sunt infirmata vestigia mea

₃₈persequar inimicos meos et conprehendam illos

et non convertar donec deficiant

₃₉confringam illos nec poterunt stare cadent subtus pedes meos

₄₀et praecinxisti me virtute ad bellum

subplantasti insurgentes in me subtus me

₄₁et inimicos meos dedisti mihi dorsum

et odientes me disperdisti

₄₂clamaverunt nec erat qui salvos faceret

ad Dominum nec exaudivit eos

₄₃et comminuam illos ut pulverem ante faciem venti

ut lutum platearum delebo eos

₄₄eripe me de contradictionibus populi

constitues me in caput gentium

₄₅populus quem non cognovi servivit mihi

in auditu auris oboedivit mihi

₄₆filii alieni mentiti sunt mihi

filii alieni inveterati sunt et claudicaverunt a semitis suis

₄₇vivit Dominus et benedictus Deus meus

et exaltetur Deus salutis meae

₄₈Deus qui dat vindictas mihi

et subdidit populos sub me

liberator meus de gentibus iracundis

₄₉et ab insurgentibus in me exaltabis me

a viro iniquo eripies me

₅₀propterea confitebor tibi in nationibus Domine

et psalmum dicam nomini tuo

₅₁magnificans salutes regis eius et faciens misericordiam christo suo

David et semini eius usque in saeculum