PSALMI IUXTA LXX 107

₂Paratum cor meum Deus paratum cor meum

cantabo et psallam in gloria mea

₃exsurge psalterium et cithara

exsurgam diluculo

₄confitebor tibi in populis Domine et psallam tibi in nationibus

₅quia magna super caelos misericordia tua

et usque ad nubes veritas tua

₆exaltare super caelos Deus et super omnem terram gloria tua

₇ut liberentur dilecti tui

salvum fac dextera tua et exaudi me

₈Deus locutus est in sancto suo

exaltabor et dividam Sicima

et convallem tabernaculorum dimetiar

₉meus est Galaad et meus est Manasse

et Effraim susceptio capitis mei Iuda rex meus

₁₀Moab lebes spei meae

in Idumeam extendam calciamentum meum

mihi alienigenae amici facti sunt

₁₁quis deducet me in civitatem munitam

quis deducet me usque in Idumeam

₁₂nonne tu Deus qui reppulisti nos

et non exibis Deus in virtutibus nostris

₁₃da nobis auxilium de tribulatione quia vana salus hominis

₁₄in Deo faciemus virtutem

et ipse ad nihilum deducet inimicos nostros