PSALMI IUXTA HEBR. 52

₁victori per chorum eruditi David

dixit stultus in corde suo non est Deus

₂corrupti sunt et abominabiles facti sunt in iniquitate

non est qui faciat bonum

₃Deus de caelo prospexit super filios hominum

ut videret si esset intellegens requirens Deum

₄omnes aversi sunt pariter adheserunt

non est qui faciat bonum non est usque ad unum

₅numquid non cognoverunt qui operantur iniquitatem

qui comedunt populum meum ut cibum panis

₆Deum non invocaverunt ibi timuerunt timore ubi non est timor

quoniam Deus dispersit ossa circumdantium te

confunderis quia Deus proiecit eos

₇quis dabit ex Sion salutare Israhel

cum reduxerit Deus captivitatem populi sui

exultabit Iacob laetabitur Israhel