PSALMI IUXTA HEBR. 49

₁canticum Asaph

fortis Deus Dominus locutus est et vocavit terram

ab ortu solis usque ad occasum eius

₂de Sion perfecta decore Deus apparuit

₃veniet Deus noster et non tacebit

ignis coram eo vorabit et in circuitu eius tempestas valida

₄vocabit caelum desursum

et terram ut iudicet populum suum

₅congregate mihi sanctos meos

qui feriunt pactum meum in sacrificio

₆et adnuntiabunt caeli iustitiam eius quia Deus iudex est semper

₇audi popule meus et loquar Israhel et contestabor te

Deus Deus tuus ego sum

₈non propter victimas tuas arguam te

et holocaustomata tua coram me sunt semper

₉non accipiam de domo tua vitulum neque de gregibus tuis hircos

₁₀mea sunt enim omnia animalia silvarum

pecudes in montibus milium

₁₁scio omnes aves montium et universitas agri mecum est

₁₂si esuriero non dicam tibi meus est enim orbis et plenitudo eius

₁₃numquid comedam carnem taurorum

aut sanguinem hircorum bibam

₁₄immola Deo laudem et redde Altissimo vota tua

₁₅et invoca me in die tribulationis

liberabo te et glorificabis me

₁₆impio autem dixit Deus

quid tibi est cum narratione praeceptorum meorum

et ut adsumas pactum meum in ore tuo

₁₇qui odisti disciplinam et proiecisti verba mea post te

₁₈si videbas furem consentiebas ei et cum adulteris erat pars tua

₁₉os tuum dimisisti ad malitiam et lingua tua concinnavit dolum

₂₀sedens adversum fratrem tuum loquebaris

et adversum filium matris tuae fabricabaris obprobrium

₂₁haec fecisti et tacui

existimasti futurum me similem tui

arguam te et proponam te ante oculos tuos

₂₂intellegite hoc qui obliviscimini Deum

ne forte capiam et non sit qui liberet

₂₃qui immolat confessionem glorificat me

et qui ordinate ambulat ostendam ei salutare Dei