PSALMI IUXTA HEBR. 38

₁pro victoria Idithun canticum David

₂dixi custodiam vias meas ne peccem in lingua mea

custodiam os meum silentio donec est impius contra me

₃obmutui silentio tacui de bono et dolor meus conturbatus est

₄incaluit cor meum in medio mei

in meditatione mea incensus sum igni

₅locutus sum lingua mea ostende mihi Domine finem meum

et mensuram dierum meorum quae sit

ut sciam quid mihi desit

₆ecce breves posuisti dies meos

et vita mea quasi non sit in conspectu tuo

omnia enim vanitas omnis homo stans semper

₇tantum in imagine ambulat homo

tantum frustra turbatur

congregat et ignorat cui dimittat ea

₈nunc ergo quid expecto Domine praestolatio mea tu es

₉ab omnibus iniquitatibus meis libera me

obprobrium stulto ne ponas me

₁₀obmutui non aperiam os meum quia tu fecisti

₁₁tolle a me plagas tuas

₁₂a contentione manus tuae ego consumptus sum

in increpationibus pro iniquitate corripuisti virum

et posuisti quasi tineam desiderabilia eius

verumtamen vanitas omnis homo semper

₁₃audi orationem meam Domine et clamorem meum exaudi

ad lacrimam meam ne obsurdescas

quia advena ego sum apud te et peregrinus sicut omnes patres mei

₁₄parce mihi ut rideam antequam vadam et non subsistam