PSALMUS CLI 1

₁Pusillus eram inter fratres meos

et adulescentior in domo patris mei

pascebam oves patris mei

₂manus meae fecerunt organum

digiti mei aptaverunt psalterium

₃et quis adnuntiabit Domino meo

ipse Dominus ipse omnium exaudiet

₄ipse misit angelum suum et tulit me de ovibus patris mei

et unxit me in misericordia unctionis suae

₅fratres mei boni et magni

et non fuit beneplacitum in eis Domino

₆exivi obviam alienigenae

et maledixit mihi in simulacris suis

₇ego autem evaginato ab eo ipsius gladio

amputavi caput eius

et abstuli obprobrium de filiis Israhel