LIBER NEEMIAE 5

₁et factus est clamor populi et uxorum eius magnus

adversus fratres suos iudaeos

₂et erant qui dicerent

filii nostri et filiae nostrae multae sunt nimis

accipiamus pro pretio eorum frumentum

et comedamus et vivamus

₃et erant qui dicerent

agros nostros et vineas et domos nostras opponamus

et accipiamus frumentum in fame

₄et alii dicebant

mutuo sumamus pecunias in tributa regis

demusque agros nostros et vineas

₅et nunc sicut carnes fratrum nostrorum sic carnes nostrae sunt

sicut filii eorum ita filii nostri

ecce nos subiugamus filios nostros et filias nostras in servitutem

et de filiabus nostris sunt famulae

nec habemus unde possint redimi

et agros nostros et vineas alii possident

₆et iratus sum nimis

cum audissem clamorem eorum secundum verba haec

₇cogitavitque cor meum mecum

et increpui optimates et magistratus et dixi eis

usurasne singuli a fratribus vestris exigatis

et congregavi adversus eos contionem magnam

₈et dixi eis

nos ut scitis redemimus fratres nostros iudaeos

qui venditi fuerant gentibus

secundum possibilitatem nostram

et vos igitur vendite fratres vestros

et emimus eos

et siluerunt nec invenerunt quid responderent

₉dixique ad eos non est bona res quam facitis

quare non in timore Dei nostri ambulatis

ne exprobretur nobis a gentibus inimicis nostris

₁₀et ego et fratres mei et pueri mei

commodavimus plurimis pecuniam et frumentum

non repetamus in commune istud aes alienum

concedamus quod debetur nobis

₁₁reddite eis hodie agros suos

vineas suas oliveta sua et domos suas

quin potius et centesimam pecuniae frumenti vini et olei

quam exigere soletis ab eis date pro illis

₁₂et dixerunt reddimus

et ab eis nihil quaerimus

sicque faciemus ut loqueris

et vocavi sacerdotes et adiuravi eos ut facerent iuxta quod dixeram

₁₃insuper et sinum meum excussi et dixi

sic excutiat Deus omnem virum qui non conpleverit verbum istud

de domo sua et de laboribus suis

sic excutiatur et vacuus fiat

et dixit universa multitudo amen et laudaverunt Deum

fecit ergo populus sicut dictum erat

₁₄a die autem illa qua praeceperat mihi

ut essem dux in terra Iuda

ab anno vicesimo usque ad annum tricesimum secundum Artarxersis regis

per annos duodecim

ego et fratres mei annonas quae ducibus debebantur non comedimus

₁₅duces autem primi qui fuerant ante me

gravaverunt populum

et acceperunt ab eis in pane vino et

pecunia

cotidie siclos quadraginta

sed et ministri eorum depresserant populum

ego autem non feci ita propter timorem Dei

₁₆quin potius in opere muri aedificavi

et agrum non emi

et omnes pueri mei congregati ad opus erant

₁₇Iudaei quoque et magistratus centum quinquaginta viri

et qui veniebant ad nos de gentibus quae in circuitu nostro sunt

in mensa mea erant

₁₈parabatur autem mihi per dies singulos

bos unus arietes sex electi exceptis volatilibus

et inter dies decem vina diversa

et alia multa tribuebam

insuper et annonas ducatus mei non quaesivi

valde enim erat adtenuatus populus

₁₉memento mei Deus meus in bonum

secundum omnia quae feci populo huic