LIBER IOB 40

₁respondens autem Dominus Iob de turbine ait

₂accinge sicut vir lumbos tuos interrogabo te et indica mihi

₃numquid irritum facies iudicium meum

et condemnabis me ut tu iustificeris

₄et si habes brachium sicut Deus et si voce simili tonas

₅circumda tibi decorem et in sublime erigere

et esto gloriosus et speciosis induere vestibus

₆disperge superbos furore tuo

et respiciens omnem arrogantem humilia

₇respice cunctos superbos et confunde eos

et contere impios in loco suo

₈absconde eos in pulvere simul

et facies eorum demerge in foveam

₉et ego confitebor quod salvare te possit dextera tua

₁₀ecce Behemoth quem feci tecum faenum quasi bos comedet

₁₁fortitudo eius in lumbis eius

et virtus illius in umbilicis ventris eius

₁₂constringit caudam suam quasi cedrum

nervi testiculorum eius perplexi sunt

₁₃ossa eius velut fistulae aeris cartilago illius quasi lamminae ferreae

₁₄ipse principium est viarum Dei

qui fecit eum adplicabit gladium eius

₁₅huic montes herbas ferunt omnes bestiae agri ludent ibi

₁₆sub umbra dormit in secreto calami et locis

humentibus

₁₇protegunt umbrae umbram eius

circumdabunt eum salices torrentis

₁₈ecce absorbebit fluvium et non mirabitur

habet fiduciam quod influat Iordanis in os eius

₁₉in oculis eius quasi hamo capiet eum

et in sudibus perforabit nares eius

₂₀an extrahere poteris Leviathan hamo

et fune ligabis linguam eius

₂₁numquid pones circulum in naribus eius

et armilla perforabis maxillam eius

₂₂numquid multiplicabit ad te preces

aut loquetur tibi mollia

₂₃numquid feriet tecum pactum et accipies eum servum sempiternum

₂₄numquid inludes ei quasi avi

aut ligabis illum ancillis tuis

₂₅concident eum amici divident illum negotiatores

₂₆numquid implebis sagenas pelle eius

et gurgustium piscium capite illius

₂₇pone super eum manum tuam

memento belli nec ultra addas loqui

₂₈ecce spes eius frustrabitur eum

et videntibus cunctis praecipitabitur