LIBER IOB 38

₁respondens autem Dominus Iob de turbine dixit

₂quis est iste involvens sententias sermonibus inperitis

₃accinge sicut vir lumbos tuos interrogabo te et responde mihi

₄ubi eras quando ponebam fundamenta terrae

indica mihi si habes intellegentiam

₅quis posuit mensuras eius si nosti

vel quis tetendit super eam lineam

₆super quo bases illius solidatae sunt

aut quis dimisit lapidem angularem eius

₇cum me laudarent simul astra matutina

et iubilarent omnes filii Dei

₈quis conclusit ostiis mare

quando erumpebat quasi de vulva procedens

₉cum ponerem nubem vestimentum eius

et caligine illud quasi pannis infantiae obvolverem

₁₀circumdedi illud terminis meis et posui vectem et ostia

₁₁et dixi usque huc venies et non procedes amplius

et hic confringes tumentes fluctus tuos

₁₂numquid post ortum tuum praecepisti diluculo

et ostendisti aurorae locum suum

₁₃et tenuisti concutiens extrema terrae et excussisti impios ex ea

₁₄restituetur ut lutum signaculum et stabit sicut vestimentum

₁₅auferetur ab impiis lux sua et brachium excelsum confringetur

₁₆numquid ingressus es profunda maris

et in novissimis abyssi deambulasti

₁₇numquid apertae tibi sunt portae mortis

et ostia tenebrosa vidisti

₁₈numquid considerasti latitudines terrae

indica mihi si nosti omnia

₁₉in qua via habitet lux

et tenebrarum quis locus sit

₂₀ut ducas unumquodque ad terminos suos

et intellegas semitas domus eius

₂₁sciebas tunc quod nasciturus esses

et numerum dierum tuorum noveras

₂₂numquid ingressus es thesauros nivis

aut thesauros grandinis aspexisti

₂₃quae praeparavi in tempus hostis

in diem pugnae et belli

₂₄per quam viam spargitur lux dividitur aestus super terram

₂₅quis dedit vehementissimo imbri cursum et viam sonantis tonitrui

₂₆ut plueret super terram absque homine

in deserto ubi nullus mortalium commoratur

₂₇ut impleret inviam et desolatam

et produceret herbas virentes

₂₈quis est pluviae pater vel quis genuit stillas roris

₂₉de cuius utero egressa est glacies et gelu de caelo quis genuit

₃₀in similitudinem lapidis aquae durantur

et superficies abyssi constringitur

₃₁numquid coniungere valebis micantes stellas Pliadis

aut gyrum Arcturi poteris dissipare

₃₂numquid producis luciferum in tempore suo

et vesperum super filios terrae consurgere facis

₃₃numquid nosti ordinem caeli et pones rationem eius in terra

₃₄numquid elevabis in nebula vocem tuam

et impetus aquarum operiet te

₃₅numquid mittes fulgura et ibunt

et revertentia dicent tibi adsumus

₃₆quis posuit in visceribus hominis sapientiam

vel quis dedit gallo intellegentiam

₃₇quis enarravit caelorum rationem

et concentum caeli quis dormire faciet

₃₈quando fundebatur pulvis in terram et glebae conpingebantur

₃₉numquid capies leaenae praedam

et animam catulorum eius implebis

₄₀quando cubant in antris et in specubus insidiantur

₄₁quis praeparat corvo escam suam

quando pulli eius ad Deum clamant vagantes eo quod non habeant cibos