LIBER IOB 36

₁addens quoque Heliu haec locutus est

₂sustine me paululum et indicabo tibi

adhuc enim habeo quod pro Deo loquar

₃repetam scientiam meam a principio

et operatorem meum probabo iustum

₄vere enim absque mendacio sermones mei

et perfecta scientia probabitur tibi

₅Deus potentes non abicit cum et ipse sit potens

₆sed non salvat impios et iudicium pauperibus tribuit

₇non aufert a iusto oculos suos

et reges in solio conlocat in perpetuum et illi eriguntur

₈et si fuerint in catenis et vinciantur funibus paupertatis

₉indicabit eis opera eorum

et scelera eorum quia violenti fuerint

₁₀revelabit quoque aurem eorum ut corripiat

et loquetur ut revertantur ab iniquitate

₁₁si audierint et observaverint

conplebunt dies suos in bono et annos suos in gloria

₁₂si autem non audierint transibunt per gladium

et consumentur in stultitia

₁₃simulatores et callidi provocant iram Dei

neque clamabunt cum vincti fuerint

₁₄morietur in tempestate anima eorum

et vita eorum inter effeminatos

₁₅eripiet pauperem de angustia sua

et revelabit in tribulatione aurem eius

₁₆igitur salvabit te de ore angusto latissime

et non habentis fundamentum subter se

requies autem mensae tuae erit plena pinguedine

₁₇causa tua quasi impii iudicata est causam iudiciumque recipies

₁₈non te ergo superet ira ut aliquem opprimas

nec multitudo donorum inclinet te

₁₉depone magnitudinem tuam absque tribulatione

et omnes robustos fortitudine

₂₀ne protrahas noctem ut ascendant populi pro eis

₂₁cave ne declines ad iniquitatem

hanc enim coepisti sequi post miseriam

₂₂ecce Deus excelsus in fortitudine sua

et nullus ei similis in legislatoribus

₂₃quis poterit scrutari vias eius

aut quis ei dicere

operatus es iniquitatem

₂₄memento quod ignores opus eius de quo cecinerunt viri

₂₅omnes homines vident eum unusquisque intuetur procul

₂₆ecce Deus magnus vincens scientiam nostram

numerus annorum eius inaestimabilis

₂₇qui aufert stillas pluviae

et effundit imbres ad instar

gurgitum

₂₈qui de nubibus fluunt quae praetexunt cuncta desuper

₂₉si voluerit extendere nubes quasi tentorium suum

₃₀et fulgurare lumine suo desuper

cardines quoque maris operiet

₃₁per haec enim iudicat populos et dat escas multis mortalibus

₃₂in manibus abscondit lucem

et praecipit ei ut rursus adveniat

₃₃adnuntiat de ea amico suo

quod possessio eius sit et ad eam possit ascendere