LIBER IOB 13

₁ecce omnia et vidit oculus meus

et audivit auris mea et intellexi singula

₂secundum scientiam vestram et ego novi nec inferior vestri sum

₃sed tamen ad Omnipotentem loquar et disputare cum Deo cupio

₄prius vos ostendens fabricatores mendacii

et cultores perversorum dogmatum

₅atque utinam taceretis ut putaremini esse sapientes

₆audite ergo correptiones meas

et iudicium labiorum meorum adtendite

₇numquid Deus indiget vestro mendacio

ut pro illo loquamini dolos

₈numquid faciem eius accipitis et pro Deo iudicare nitimini

₉aut placebit ei quem celare nihil potest

aut decipietur ut homo vestris fraudulentiis

₁₀ipse vos arguet quoniam in abscondito faciem eius accipitis

₁₁statim ut se commoverit turbabit vos

et terror eius inruet super vos

₁₂memoria vestra conparabitur cineri

et redigentur in lutum cervices vestrae

₁₃tacete paulisper ut loquar quodcumque mihi mens suggesserit

₁₄quare lacero carnes meas dentibus meis

et animam meam porto in manibus meis

₁₅etiam si occiderit me in ipso sperabo

verumtamen vias meas in conspectu eius arguam

₁₆et ipse erit salvator meus

non enim veniet in conspectu eius omnis hypocrita

₁₇audite sermonem meum et enigmata percipite auribus vestris

₁₈si fuero iudicatus scio quod iustus inveniar

₁₉quis est qui iudicetur mecum veniat quare tacens consumor

₂₀duo tantum ne facias mihi et tunc a facie tua non abscondar

₂₁manum tuam longe fac a me

et formido tua non me terreat

₂₂et voca me et respondebo tibi

aut certe loquar et tu responde mihi

₂₃quantas habeo iniquitates et peccata

scelera mea et delicta ostende mihi

₂₄cur faciem tuam abscondis et arbitraris me inimicum tuum

₂₅contra folium quod vento rapitur ostendis potentiam tuam

et stipulam siccam persequeris

₂₆scribis enim contra me amaritudines

et consumere me vis peccatis adulescentiae meae

₂₇posuisti in nervo pedem meum et observasti omnes semitas meas

et vestigia pedum meorum considerasti

₂₈qui quasi putredo consumendus sum

et quasi vestimentum quod comeditur a tinea