LIBER IOB 11

₁respondens autem Sophar Naamathites dixit

₂numquid qui multa loquitur non et audiet

aut vir verbosus iustificabitur

₃tibi soli tacebunt homines

et cum ceteros inriseris a nullo confutaberis

₄dixisti enim purus est sermo meus et mundus sum in conspectu tuo

₅atque utinam Deus loqueretur tecum et aperiret labia sua tibi

₆ut ostenderet tibi secreta sapientiae et quod multiplex esset lex eius

et intellegeres quod multo minora exigaris a Deo

quam meretur iniquitas tua

₇forsitan vestigia Dei conprehendes

et usque ad perfectum Omnipotentem repperies

₈excelsior caelo est et quid facies

profundior inferno et unde cognosces

₉longior terrae mensura eius et latior mari

₁₀si subverterit omnia vel in unum coartaverit quis contradicet ei

₁₁ipse enim novit hominum vanitatem

et videns iniquitatem nonne considerat

₁₂vir vanus in superbiam erigitur

et tamquam pullum onagri se liberum natum putat

₁₃tu autem firmasti cor tuum et expandisti ad eum manus tuas

₁₄si iniquitatem quod est in manu tua abstuleris a te

et non manserit in tabernaculo tuo iniustitia

₁₅tum levare poteris faciem tuam absque macula

et eris stabilis et non timebis

₁₆miseriae quoque oblivisceris

et quasi aquarum quae praeterierint recordaberis

₁₇et quasi meridianus fulgor consurget tibi ad vesperam

et cum te consumptum putaveris orieris ut lucifer

₁₈et habebis fiduciam proposita tibi spe

et defossus securus dormies

₁₉requiesces et non erit qui te exterreat

et deprecabuntur faciem tuam plurimi

₂₀oculi autem impiorum deficient et effugium peribit ab eis et spes eorum abominatio animae