HIEREMIAS PROPHETA 48

₁ad Moab

haec dicit Dominus exercituum Deus Israhel

vae super Nabo quoniam vastata est et confusa

capta est Cariathaim confusa est fortis et tremuit

₂non est ultra exultatio in Moab

contra Esebon cogitaverunt malum

venite et disperdamus eam de gente

ergo silens conticesces sequeturque te gladius

₃vox clamoris de Oronaim vastitas et contritio magna

₄contrita est Moab adnuntiate clamorem parvulis eius

₅per ascensum enim Luaith plorans ascendet in

fletu

quoniam in descensu Oronaim hostes ululatum contritionis

audierunt

₆fugite salvate animas vestras

et eritis quasi myrice in deserto

₇pro eo enim quod habuisti fiduciam in munitionibus tuis

et in thesauris tuis

tu quoque capieris

et ibit Chamos in transmigrationem

sacerdotes eius et principes eius simul

₈et veniet praedo ad omnem urbem et urbs nulla salvabitur

et peribit vallis et dissipabuntur campestria

quoniam dixit Dominus

₉date florem Moab quia floriens egredietur

et civitates eius desertae erunt et inhabitabiles

₁₀maledictus qui facit opus Domini fraudulenter

et maledictus qui prohibet gladium suum a sanguine

₁₁fertilis fuit Moab ab adulescentia sua

et requievit in fecibus suis nec transfusus est de vase in vas

et in transmigrationem non abiit

idcirco permansit gustus eius in eo

et odor eius non est inmutatus

₁₂propterea ecce dies veniunt dicit Dominus

et mittam ei ordinatores et stratores laguncularum et sternent eum

et vasa eius exhaurient

et lagoenas eorum conlident

₁₃et confundetur Moab a Chamos

sicut confusa est domus Israhel a Bethel in qua habebat fiduciam

₁₄quomodo dicitis fortes sumus et viri robusti ad proeliandum

₁₅vastata est Moab et civitates illius ascenderunt

et electi iuvenes eius descenderunt in occisionem

ait Rex Dominus exercituum nomen ei

₁₆prope est interitus Moab ut veniat

et malum eius velociter adcurret nimis

₁₇consolamini eum omnes qui estis in circuitu eius

et universi qui scitis nomen eius

dicite quomodo confracta est virga fortis baculus gloriosus

₁₈descende de gloria et sede in siti habitatio filiae Dibon

quoniam vastator Moab ascendet ad te

dissipabit munitiones tuas

₁₉in via sta et prospice habitatio Aroer

interroga fugientem et eum qui evasit dic quid accidit

₂₀confusus est Moab quoniam victus est

ululate et clamate

adnuntiate in Arnon quoniam vastata est Moab

₂₁et iudicium venit ad terram campestrem

super Helon et super Iaesa et super Mefath

₂₂et super Dibon et super Nabo et super domum Deblathaim

₂₃et super Cariathaim et super Bethgamul et super Bethmaon

₂₄et super Carioth et super Bosra

et super omnes civitates terrae Moab quae longe et quae prope sunt

₂₅abscisum est cornu Moab

et brachium eius contritum est ait Dominus

₂₆inebriate eum quoniam contra Dominum erectus est

et adlidet manum Moab in vomitu suo

et erit in derisum etiam ipse

₂₇fuit enim in derisum tibi Israhel

quasi inter fures repperisses eum

propter verba ergo tua quae adversum illum locutus es

captivus duceris

₂₈relinquite civitates et habitate in petra habitatores Moab

et estote quasi columba nidificans in summo ore foraminis

₂₉audivimus superbiam Moab superbus est valde

sublimitatem eius et arrogantiam et superbiam

et altitudinem cordis illius

₃₀ego scio ait Dominus iactantiam eius

et quod non sit iuxta eam virtus eius

nec iuxta quod poterat conata sit facere

₃₁ideo super Moab heiulabo

et ad Moab universam clamabo ad viros muri fictilis

lamentantes

₃₂de planctu Iazer plorabo tibi vinea Sobema

propagines tuae transierunt mare

usque ad mare Iazer pervenerunt

super messem tuam et vindemiam tuam praedo inruit

₃₃ablata est laetitia et exultatio de Carmelo et de terra Moab

et vinum de torcularibus sustuli

nequaquam calcator uvae solitum celeuma cantabit

₃₄de clamore Esebon usque Eleale et Iaesa dederunt vocem suam

a Segor usque ad Oronaim vitula conternante

aquae quoque Namrim pessimae erunt

₃₅et auferam de Moab ait Dominus offerentem in excelsis

et sacrificantem diis eius

₃₆propterea cor meum ad Moab quasi tibiae resonabit

et cor meum ad viros muri fictilis dabit sonitum tibiarum

quia plus fecit quam potuit idcirco perierunt

₃₇omne enim caput calvitium et omnis barba rasa erit

in cunctis manibus conligatio et super omne dorsum cilicium

₃₈super omnia tecta Moab et in plateis eius omnis planctus

quia contrivi Moab sicut vas inutile ait Dominus

₃₉quomodo victa est et ululaverunt

quomodo deiecit cervicem Moab et confusus est

eritque Moab in derisum et in exemplum omnibus in circuitu suo

₄₀haec dicit Dominus

ecce quasi aquila evolabit

et extendet alas suas ad Moab

₄₁capta est Carioth et munitiones conprehensae sunt

et erit cor fortium Moab in die illa sicut cor mulieris parturientis

₄₂et cessabit Moab esse populus

quoniam contra Dominum gloriatus est

₄₃pavor et fovea et laqueus super te

o habitator Moab ait Dominus

₄₄qui fugit a facie pavoris cadet in foveam

et qui conscenderit de fovea capietur laqueo

adducam enim super Moab annum visitationis eorum

dicit Dominus

₄₅in umbra Esebon steterunt de laqueo fugientes

quia ignis egressus est de Esebon et flamma de medio Seon

et devorabit partem Moab et verticem filiorum tumultus

₄₆vae tibi Moab peristi popule Chamos

quia conprehensi sunt filii tui et filiae tuae in captivitatem

₄₇et convertam captivitatem Moab in novissimis diebus ait Dominus

hucusque iudicia Moab