ISAIAS PROPHETA 62

₁propter Sion non tacebo et propter Hierusalem non quiescam

donec egrediatur ut splendor iustus eius

et salvator eius ut lampas accendatur

₂et videbunt gentes iustum tuum

et cuncti reges inclitum tuum

et vocabitur tibi nomen novum quod os Domini nominabit

₃et eris corona gloriae in manu Domini

et diadema regni in manu Dei tui

₄non vocaberis ultra Derelicta

et terra tua non vocabitur amplius Desolata

sed vocaberis Voluntas mea in ea

et terra tua Inhabitata

quia conplacuit Domino in te et terra tua inhabitabitur

₅habitabit enim iuvenis cum virgine et habitabunt in te filii tui

et gaudebit sponsus super sponsam

gaudebit super te Deus tuus

₆super muros tuos Hierusalem constitui custodes

tota die et tota nocte perpetuo non tacebunt

qui reminiscimini Domini ne taceatis

₇et ne detis silentium ei donec stabiliat

et donec ponat Hierusalem laudem in terra

₈iuravit Dominus in dextera sua et in brachio fortitudinis suae

si dedero triticum tuum ultra cibum inimicis tuis

et si biberint filii alieni vinum tuum in quo laborasti

₉quia qui congregabunt illud comedent

et laudabunt Dominum

et qui conportant illud bibent in atriis sanctis meis

₁₀transite transite per portas praeparate viam populo

planum facite iter et eligite lapides

elevate signum ad populos

₁₁ecce Dominus auditum fecit in extremis terrae

dicite filiae Sion ecce salvator tuus venit

ecce merces eius cum eo et opus eius coram illo

₁₂et vocabunt eos Populus sanctus Redempti a Domino

tu autem vocaberis Quaesita civitas et non Derelicta