HIEZECHIEL PROPHETA 45

₁cumque coeperitis terram dividere

sortito separate primitias Domino

sanctificatum de terra longitudine viginti quinque milia

et latitudine decem milia

sanctificatum erit in omni termino eius per circuitum

₂et erit ex omni parte sanctificatum

quingentos per quingentos quadrifariam per circuitum

et quinquaginta cubitis in suburbana eius per gyrum

₃et a mensura ista mensurabis longitudinem viginti quinque milium

et latitudinem decem milium

et in ipso erit templum sanctumque sanctorum

₄sanctificatum de terra erit sacerdotibus ministris sanctuarii

qui accedunt ad ministerium Domini

et erit eis locus in domos et in sanctuarium sanctitatis

₅viginti quinque autem milia longitudinis et decem milia latitudinis

erunt Levitis qui ministrant domui

ipsi possidebunt viginti gazofilacia

₆et possessionem civitatis dabitis

quinque milia latitudinis et longitudinis viginti quinque milia

secundum separationem sanctuarii omni domui Israhel

₇principi quoque hinc et inde in separationem sanctuarii

et in possessionem civitatis

contra faciem separationis sanctuarii

et contra faciem possessionis urbis

a latere maris usque ad mare et a latere orientis usque ad orientem

longitudinem autem iuxta unamquamque partium

a termino occidentali usque ad terminum orientalem

₈de terra erit ei possessio in Israhel

et non depopulabuntur ultra principes populum meum

sed terram dabunt domui Israhel secundum tribus eorum

₉haec dicit Dominus Deus sufficiat vobis principes Israhel

iniquitatem et rapinas intermittite et iudicium et iustitiam facite

separate confinia vestra a populo meo ait Dominus Deus

₁₀statera iusta et oephi iustum et batus iustus erit vobis

₁₁oephi et batus aequalia et unius mensurae erunt

ut capiat decimam partem chori batus et decimam partem chori oephi

iuxta mensuram chori erit aequa libratio eorum

₁₂siclus autem viginti obolos habeat

porro viginti sicli et viginti quinque sicli et quindecim sicli minam

facient

₁₃et haec sunt primitiae quas tolletis

sextam partem oephi de choro frumenti

et sextam partem oephi de choro hordei

₁₄mensura quoque olei batus olei decima pars chori est

et decem bati chorum faciunt quia decem bati implent chorum

₁₅et arietem unum de grege ducentorum

de his quae nutriunt Israhel in sacrificium

et in holocaustum et in pacifica

ad expiandum pro eis ait Dominus Deus

₁₆omnis populus terrae tenebitur primitiis his principi in Israhel

₁₇et super principem erunt holocausta et sacrificium et libamina

in sollemnitatibus et in kalendis et in sabbatis

in universis sollemnitatibus domus Israhel

ipse faciat pro peccato sacrificium et holocaustum et

pacifica

ad expiandum pro domo Israhel

₁₈haec dicit Dominus Deus

in primo mense una mensis sumes vitulum de armento inmaculatum

et expiabis sanctuarium

₁₉et tollet sacerdos de sanguine quod erit pro peccato

et ponet in postibus domus

et in quattuor angulis crepidinis altaris

et in postibus portae atrii interioris

₂₀et sic facies in septima mensis

pro unoquoque qui ignoravit et errore deceptus est

et expiabitis pro domo

₂₁in primo mense quartadecima die mensis erit vobis paschae sollemnitas

septem diebus azyma comedentur

₂₂et faciet princeps in die illa

pro se et pro universo populo terrae vitulum pro peccato

₂₃et in septem dierum sollemnitate faciet holocaustum Domino

septem vitulos et septem arietes inmaculatos cotidie septem diebus

et pro peccato hircum caprarum cotidie

₂₄et sacrificium oephi per vitulum et oephi per arietem faciet

et olei hin per singula oephi

₂₅septimo mense quintadecima die mensis in sollemnitate

faciet sicut supra dicta sunt per septem dies

tam pro peccato quam pro holocausto et in sacrificio et in oleo