HIEZECHIEL PROPHETA 33

₁et factum est verbum Domini ad me dicens

₂fili hominis loquere ad filios populi tui et dices ad eos

terra cum induxero super eam gladium

et tulerit populus terrae virum unum de novissimis suis

et constituerit eum super se speculatorem

₃et ille viderit gladium venientem super terram

et cecinerit bucina et adnuntiaverit populo

₄audiens autem quisquis ille est sonum bucinae

non se observaverit veneritque gladius et tulerit eum

sanguis ipsius super caput eius erit

₅sonum bucinae audivit et non se observavit

sanguis eius in ipso erit

si autem custodierit animam suam salvavit

₆quod si speculator viderit gladium venientem

et non insonuerit bucina et populus non se custodierit

veneritque gladius et tulerit de eis animam

ille quidem in iniquitate sua captus est

sanguinem autem eius de manu speculatoris requiram

₇et tu fili hominis speculatorem dedi te domui Israhel

audiens ergo ex ore meo sermonem adnuntiabis eis ex me

₈si me dicente ad impium impie morte morieris

non fueris locutus ut se custodiat impius a via sua

ipse impius in iniquitate sua morietur

sanguinem autem eius de manu tua requiram

₉si autem adnuntiante te ad impium ut a viis suis convertatur

non fuerit conversus a via sua

ipse in iniquitate sua morietur porro tu animam tuam liberasti

₁₀tu ergo fili hominis dic ad domum Israhel

sic locuti estis dicentes

iniquitates nostrae et peccata nostra super nos sunt

et in ipsis nos tabescimus quomodo ergo vivere poterimus

₁₁dic ad eos vivo ego dicit Dominus Deus nolo mortem impii

sed ut revertatur impius a via sua et vivat

convertimini a viis vestris pessimis

et quare moriemini domus Israhel

₁₂tu itaque fili hominis dic ad filios populi tui

iustitia iusti non liberabit eum in quacumque die peccaverit

et impietas impii non nocebit ei

in quacumque die conversus fuerit ab impietate sua

et iustus non poterit vivere in iustitia sua

in quacumque die peccaverit

₁₃etiam si dixero iusto quod vita vivat

et confisus in iustitia sua fecerit iniquitatem

omnes iustitiae eius oblivioni tradentur

et in iniquitate sua quam operatus est in ipsa morietur

₁₄sin autem dixero impio morte morieris

et egerit paenitentiam a peccato suo feceritque iudicium et iustitiam

₁₅pignus restituerit ille impius rapinamque reddiderit

in mandatis vitae ambulaverit nec fecerit quicquam iniustum

vita vivet non morietur

₁₆omnia peccata eius quae peccavit non inputabuntur ei

iudicium et iustitiam fecit vita vivet

₁₇et dixerunt filii populi tui non est aequi ponderis via Domini

et ipsorum via iniusta est

₁₈cum enim recesserit iustus a iustitia sua

feceritque iniquitatem

morietur in eis

₁₉et cum recesserit impius ab impietate sua

feceritque iudicium et iustitiam

vivet in eis

₂₀et dicitis non recta via Domini

unumquemque iuxta vias suas iudicabo de vobis domus Israhel

₂₁et factum est in duodecimo anno in duodecimo mense

in quinta mensis transmigrationis nostrae

venit ad me qui fugerat de Hierusalem dicens vastata est civitas

₂₂manus autem Domini facta fuerat ad me vespere

antequam veniret qui fugerat

aperuitque os meum donec veniret ad me mane

et aperto ore meo non silui amplius

₂₃et factum est verbum Domini ad me dicens

₂₄fili hominis qui habitant in ruinosis his super humum Israhel loquentes

aiunt

unus erat Abraham et hereditate possedit terram

nos autem multi nobis data est terra in possessionem

₂₅idcirco dices ad eos haec dicit Dominus Deus

qui in sanguine comeditis

et oculos vestros levatis ad inmunditias vestras

et sanguinem funditis

numquid terram hereditate possidebitis

₂₆stetistis in gladiis vestris fecistis abominationes

et unusquisque uxorem proximi sui polluit

et terram hereditate possidebitis

₂₇haec dices ad eos sic dicit Dominus Deus

vivo ego quia qui in ruinosis habitant gladio cadent

et qui in agro est bestiis tradetur ad devorandum

qui autem in praesidiis et in speluncis sunt peste morientur

₂₈et dabo terram in solitudinem et desertum

et deficiet superba fortitudo eius

et desolabuntur montes Israhel

eo quod nullus sit qui per eos transeat

₂₉et scient quia ego Dominus

cum dedero terram desolatam et desertam

propter universas abominationes suas quas operati sunt

₃₀et tu fili hominis

filii populi tui qui loquuntur de te iuxta muros et in ostiis domorum

et dicunt unus ad alterum vir ad proximum suum loquentes

venite et audiamus qui sit sermo egrediens a Domino

₃₁et veniunt ad te quasi si ingrediatur populus

et sedent coram te populus meus

et audiunt sermones tuos et non faciunt eos

quia in canticum oris sui vertunt illos

et avaritiam suam sequitur cor eorum

₃₂et es eis quasi carmen musicum quod suavi dulcique sono canitur

et audient verba tua et non facient ea

₃₃et cum venerit quod praedictum est ecce enim venit

tunc scient quod prophetes fuerit inter eos