LIBER EXODI 39

₁de hyacintho vero et purpura vermiculo ac bysso

fecit vestes quibus indueretur Aaron quando ministrabat in sanctis

sicut praecepit Dominus Mosi

₂fecit igitur superumerale

de auro hyacintho et purpura coccoque bis tincto et bysso retorta

₃opere polymitario

inciditque bratteas aureas et extenuavit in fila

ut possint torqueri cum priorum colorum

subtemine

₄duasque oras sibi invicem copulatas

in utroque latere summitatum

₅et balteum ex hisdem coloribus

sicut praeceperat Dominus Mosi

₆paravit et duos lapides onychinos adstrictos et inclusos auro

et sculptos arte gemmaria nominibus filiorum Israhel

₇posuitque eos in lateribus superumeralis

in monumentum filiorum Israhel

sicut praeceperat Dominus Mosi

₈fecit et rationale opere polymito iuxta opus superumeralis

ex auro hyacintho purpura coccoque bis tincto et bysso retorta

₉quadrangulum duplex mensurae palmi

₁₀et posuit in eo gemmarum ordines quattuor

in primo versu erat sardius topazius zmaragdus

₁₁in secundo carbunculus sapphyrus iaspis

₁₂in tertio ligyrius achates amethistus

₁₃in quarto chrysolitus onychinus berillus

circumdati et inclusi auro per ordines suos

₁₄ipsique lapides duodecim sculpti erant nominibus duodecim

tribuum Israhel

singuli per nomina singulorum

₁₅fecerunt in rationali et catenulas sibi invicem coherentes de auro

purissimo

₁₆et duos uncinos totidemque anulos aureos

porro anulos posuerunt in utroque latere rationalis

₁₇e quibus penderent duae catenae aureae quas inseruerunt uncinis

qui in superumeralis angulis eminebant

₁₈haec et ante et retro ita conveniebant sibi

ut superumerale et rationale mutuo necterentur

₁₉stricta ad balteum et anulis fortius copulata

quos iungebat vitta hyacinthina

ne laxe fluerent et a se invicem moverentur

sicut praecepit Dominus Mosi

₂₀fecerunt quoque tunicam superumeralis totam hyacinthinam

₂₁et capitium in superiori parte contra medium

oramque per gyrum capitii textilem

₂₂deorsum autem ad pedes mala punica

ex hyacintho purpura vermiculo ac bysso retorta

₂₃et tintinabula de auro mundissimo

quae posuerunt inter mala granata

in extrema parte tunicae per gyrum

₂₄tintinabulum aureum et malum punicum

quibus ornatus incedebat pontifex quando ministerio fungebatur

sicut praecepit Dominus Mosi

₂₅fecerunt et tunicas byssinas opere textili Aaron et filiis eius

₂₆et mitras cum coronulis suis ex bysso

₂₇feminalia quoque linea byssina

₂₈cingulum vero de bysso retorta hyacintho purpura ac vermiculo

distinctum arte plumaria

sicut praecepit Dominus Mosi

₂₉fecerunt et lamminam sacrae venerationis de auro purissimo

scripseruntque in ea opere gemmario Sanctum Domini

₃₀et strinxerunt eam cum mitra vitta hyacinthina

sicut praecepit Dominus Mosi

₃₁perfectum est igitur omne opus tabernaculi et tecti testimonii

feceruntque filii Israhel cuncta quae praeceperat Dominus

Mosi

₃₂et obtulerunt tabernaculum et tectum et universam supellectilem

anulos tabulas vectes columnas ac bases

₃₃opertorium de pellibus arietum rubricatis

et aliud operimentum de ianthinis pellibus

₃₄velum arcam vectes propitiatorium

₃₅mensam cum vasis et propositionis panibus

₃₆candelabrum lucernas et utensilia eorum cum oleo

₃₇altare aureum et unguentum thymiama ex aromatibus

₃₈et tentorium in introitu tabernaculi

₃₉altare aeneum retiaculum vectes et vasa eius omnia

labrum cum basi sua

tentoria atrii et columnas cum basibus suis

₄₀tentorium in introitu atrii funiculosque illius et paxillos

nihil ex vasis defuit

quae in ministerium tabernaculi et in tectum foederis iussa sunt fieri

₄₁vestes quoque quibus sacerdotes utuntur in sanctuario

Aaron scilicet et filii eius

₄₂obtulerunt filii Israhel sicut praeceperat Dominus

₄₃quae postquam Moses cuncta vidit expleta

benedixit eis