LIBER EXODI 20

₁locutus quoque est Dominus cunctos

sermones hos

₂ego sum Dominus Deus tuus

qui eduxi te de terra Aegypti de domo servitutis

₃non habebis deos alienos coram me

₄non facies tibi sculptile

neque omnem similitudinem quae est in caelo desuper

et quae in terra deorsum

nec eorum quae sunt in aquis sub terra

₅non adorabis ea neque coles

ego sum Dominus Deus tuus fortis zelotes

visitans iniquitatem patrum in filiis

in tertiam et quartam generationem eorum qui oderunt me

₆et faciens misericordiam in milia

his qui diligunt me et custodiunt praecepta mea

₇non adsumes nomen Domini Dei tui in vanum

nec enim habebit insontem Dominus eum

qui adsumpserit nomen Domini Dei sui frustra

₈memento ut diem sabbati sanctifices

₉sex diebus operaberis et facies omnia opera tua

₁₀septimo autem die sabbati Domini Dei tui

non facies omne opus

tu et filius tuus et filia tua servus tuus et ancilla tua

iumentum tuum et advena qui est intra portas tuas

₁₁sex enim diebus fecit Dominus caelum et terram

et mare et omnia quae in eis sunt

et requievit in die septimo

idcirco benedixit Dominus diei sabbati

et sanctificavit eum

₁₂honora patrem tuum et matrem tuam

ut sis longevus super terram quam Dominus Deus tuus dabit tibi

₁₃non occides

₁₄non moechaberis

₁₅non furtum facies

₁₆non loqueris contra proximum tuum falsum testimonium

₁₇non concupisces domum proximi tui

nec desiderabis uxorem eius

non servum non ancillam non bovem non asinum

nec omnia quae illius sunt

₁₈cunctus autem populus videbat voces et lampadas

et sonitum bucinae montemque fumantem

et perterriti ac pavore concussi steterunt procul

₁₉dicentes Mosi

loquere tu nobis et audiemus

non loquatur nobis Dominus ne forte moriamur

₂₀et ait Moses ad populum nolite timere

ut enim probaret vos venit Deus

et ut terror illius esset in vobis et non peccaretis

₂₁stetitque populus de longe

Moses autem accessit ad caliginem in qua erat Deus

₂₂dixit praeterea Dominus ad Mosen haec dices filiis Israhel

vos vidistis quod de caelo locutus sum vobis

₂₃non facietis mecum deos argenteos

nec deos aureos facietis vobis

₂₄altare de terra facietis mihi

et offeretis super eo holocausta et pacifica vestra

oves vestras et boves in omni loco in quo memoria fuerit nominis mei

veniam ad te et benedicam tibi

₂₅quod si altare lapideum feceris mihi

non aedificabis illud de sectis lapidibus

si enim levaveris cultrum tuum super eo polluetur

₂₆non ascendes per gradus ad altare meum ne reveletur turpitudo tua