LIBER DEUTERONOMII 5

₁vocavitque Moses omnem Israhelem et dixit ad eum

audi Israhel caerimonias atque iudicia

quae ego loquor in auribus vestris hodie

discite ea et opere conplete

₂Dominus Deus noster pepigit nobiscum foedus in Horeb

₃non cum patribus nostris iniit pactum

sed nobiscum qui inpraesentiarum sumus et vivimus

₄facie ad faciem locutus est nobis in monte de medio

ignis

₅ego sequester et medius fui inter Dominum et vos in tempore

illo

ut adnuntiarem vobis verba eius

timuistis enim ignem et non ascendistis in montem

et ait

₆ego Dominus Deus tuus

qui eduxi te de terra Aegypti de domo servitutis

₇non habebis deos alienos in conspectu meo

₈non facies tibi sculptile nec similitudinem omnium

quae in caelo sunt desuper et quae in terra deorsum

et quae versantur in aquis sub terra

₉non adorabis ea et non coles

ego enim sum Dominus Deus tuus Deus aemulator

reddens iniquitatem patrum super filios

in tertiam et quartam generationem his qui oderunt me

₁₀et faciens misericordiam in multa milia

diligentibus me et custodientibus praecepta mea

₁₁non usurpabis nomen Domini Dei tui frustra

quia non erit inpunitus qui super re vana nomen eius

adsumpserit

₁₂observa diem sabbati ut sanctifices eum

sicut praecepit tibi Dominus Deus tuus

₁₃sex diebus operaberis et facies omnia opera tua

₁₄septimus dies sabbati est id est requies Domini Dei tui

non facies in eo quicquam operis tu et filius tuus et filia

servus et ancilla et bos et asinus et omne iumentum tuum

et peregrinus qui est intra portas tuas

ut requiescat servus et ancilla tua sicut et tu

₁₅memento quod et ipse servieris in Aegypto

et eduxerit te inde Dominus Deus tuus

in manu forti et brachio extento

idcirco praecepit tibi ut observares diem sabbati

₁₆honora patrem tuum et matrem

sicut praecepit tibi Dominus Deus tuus

ut longo vivas tempore

et bene sit tibi in terra quam Dominus Deus tuus daturus est tibi

₁₇non occides

₁₈neque moechaberis

₁₉furtumque non facies

₂₀nec loqueris contra proximum tuum falsum testimonium

₂₁non concupisces uxorem proximi tui

non domum non agrum non servum non ancillam

non bovem non asinum et universa quae illius sunt

₂₂haec verba locutus est Dominus ad omnem multitudinem vestram in monte

de medio ignis et nubis et caliginis voce magna

nihil addens amplius

et scripsit ea in duabus tabulis lapideis quas tradidit mihi

₂₃vos autem postquam audistis vocem de medio tenebrarum

et montem ardere vidistis

accessistis ad me omnes principes tribuum et maiores natu atque dixistis

₂₄ecce ostendit nobis Dominus Deus noster maiestatem et magnitudinem suam

vocem eius audivimus de medio ignis

et probavimus hodie quod loquente Deo cum homine vixerit homo

₂₅cur ergo morimur et devorabit nos ignis hic maximus

si enim audierimus ultra vocem Domini Dei nostri moriemur

₂₆quid est omnis caro

ut audiat vocem Dei viventis qui de medio

ignis loquitur sicut nos audivimus et possit vivere

₂₇tu magis accede et audi cuncta quae dixerit Dominus Deus noster tibi

loquerisque ad nos et nos audientes faciemus ea

₂₈quod cum audisset Dominus ait ad me

audivi vocem verborum populi huius

quae locuti sunt tibi bene omnia sunt locuti

₂₉quis det talem eos habere mentem ut timeant me

et custodiant universa mandata mea in omni tempore

ut bene sit eis et filiis eorum in sempiternum

₃₀vade et dic eis revertimini in tentoria vestra

₃₁tu vero hic sta mecum

et loquar tibi omnia mandata et caerimonias atque iudicia

quae docebis eos

ut faciant ea in terra quam dabo illis in possessionem

₃₂custodite igitur et facite quae praecepit Dominus Deus vobis

non declinabitis neque ad dextram neque ad sinistram

₃₃sed per viam quam praecepit Dominus Deus vester ambulabitis

ut vivatis et bene sit vobis

et protelentur dies in terra possessionis vestrae