DANIHEL PROPHETA 5

₁Balthasar rex fecit grande convivium optimatibus suis mille

et unusquisque secundum suam bibebat aetatem

₂praecepit ergo iam temulentus

ut adferrentur vasa aurea et argentea

quae asportaverat Nabuchodonosor pater eius

de templo quod fuit in Hierusalem

ut biberent in eis rex et optimates eius

uxoresque eius et concubinae

₃tunc adlata sunt vasa aurea

quae asportaverat de templo quod fuerat in Hierusalem

et biberunt in eis rex et optimates eius

uxores et concubinae illius

₄bibebant vinum

et laudabant deos suos aureos et argenteos

et aereos ferreos ligneosque et lapideos

₅in eadem hora apparuerunt digiti quasi manus hominis

scribentes contra candelabrum in superficie parietis aulae regiae

et rex aspiciebat articulos manus scribentis

₆tunc regis facies commutata est

et cogitationes eius perturbabant eum

et conpages renum eius solvebantur

et genua eius ad se invicem conlidebantur

₇exclamavit itaque rex fortiter

ut introducerent magos Chaldeos et aruspices

et proloquens rex ait sapientibus Babylonis

quicumque legerit scripturam hanc

et interpretationem eius manifestam mihi fecerit

purpura vestietur et torquem auream habebit in collo

et tertius in regno meo erit

₈tunc ingressi omnes sapientes regis

non potuerunt nec scripturam legere

nec interpretationem indicare regi

₉unde rex Balthasar satis conturbatus est

et vultus illius inmutatus est

sed et optimates eius turbabantur

₁₀regina autem pro re quae acciderat regi et optimatibus eius

domum convivii ingressa est et proloquens ait

rex in aeternum vive

non te conturbent cogitationes tuae neque facies tua inmutetur

₁₁est vir in regno tuo qui spiritum deorum sanctorum habet in se

et in diebus patris tui scientia et sapientia inventae sunt in eo

nam et rex Nabuchodonosor pater tuus

principem magorum incantatorum Chaldeorum et aruspicum constituit eum

pater inquam tuus o rex

₁₂quia spiritus amplior et prudentia intellegentiaque

interpretatio somniorum et ostensio secretorum

ac solutio ligatorum inventae sunt in eo

hoc est in Danihelo

cui rex posuit nomen Balthasar

nunc itaque Danihel vocetur et interpretationem narrabit

₁₃igitur introductus est Danihel coram rege

ad quem praefatus rex ait

tu es Danihel de filiis captivitatis Iudae

quam adduxit rex pater meus de Iudaea

₁₄audivi de te quoniam spiritum deorum habeas

et scientia intellegentiaque ac sapientia ampliores inventae

sint in te

₁₅et nunc introgressi sunt in conspectu meo sapientes magi

ut scripturam hanc legerent et interpretationem eius indicarent mihi

et nequiverunt sensum sermonis huius edicere

₁₆porro ego audivi de te

quod possis obscura interpretari et ligata dissolvere

si ergo vales scripturam legere

et interpretationem indicare mihi

purpura vestieris et torquem auream circa collum tuum habebis

et tertius in regno meo princeps eris

₁₇ad quae respondens Danihel ait coram rege

munera tua sint tibi et dona domus tuae alteri da

scripturam autem legam tibi rex

et interpretationem eius ostendam tibi

₁₈o rex Deus altissimus regnum et magnificentiam

gloriam et honorem dedit Nabuchodonosor patri tuo

₁₉et propter magnificentiam quam dederat ei

universi populi tribus et linguae tremebant et metuebant eum

quos volebat interficiebat et quos volebat percutiebat

quos volebat exaltabat et quos volebat humiliabat

₂₀quando autem elevatum est cor eius

et spiritus illius obfirmatus est ad superbiam

depositus est de solio regni sui et gloria eius ablata est

₂₁et a filiis hominum eiectus est

sed et cor eius cum bestiis positum est

et cum onagris erat habitatio eius

faenum quoque ut bos comedebat

et rore caeli corpus eius infectum est donec cognosceret

quod potestatem habeat Altissimus in regno hominum

et quemcumque voluerit suscitabit super illud

₂₂tu quoque filius eius Balthasar non humiliasti cor tuum

cum scires haec omnia

₂₃sed adversum Dominatorem caeli elevatus es

et vasa domus eius adlata sunt coram te

et tu et optimates tui et uxores tuae et concubinae

vinum bibistis in eis

deos quoque argenteos et aureos et aereos

ferreos ligneosque et lapideos

qui non vident neque audiunt neque sentiunt laudasti

porro Deum qui habet flatum tuum in manu sua et omnes vias tuas

non glorificasti

₂₄idcirco ab eo missus est articulus manus

quae scripsit hoc quod exaratum est

₂₅haec est autem scriptura quae digesta est mane thecel fares

₂₆et haec interpretatio sermonis

mane numeravit Deus regnum tuum et conplevit illud

₂₇thecel adpensus es in statera

et inventus es minus habens

₂₈fares divisum est regnum tuum et datum est Medis et Persis

₂₉tunc iubente rege indutus est Danihel purpura

et circumdata est torques aurea collo eius

et praedicatum est de eo

quod haberet potestatem tertius in regno

₃₀eadem nocte interfectus est Balthasar rex Chaldeus

₃₁et Darius Medus successit in regnum

annos natus sexaginta duo