LIBER EZRAE IIII 14

₃Revelans revelatus sum super rubum et locutus sum Moysi, quando populus meus serviebat in Aegypto. ₄Et misi eum et eduxi populum meum de Aegypto, et adduxi eum super montem Sina et detinebam eum apud me diebus multis, ₅et enarravi ei mirabilia multa, et ostendi ei temporum secreta et temporum finem. Et praecepi ei dicens: ₆Haec in palam facies verba et haec abscondes. ₇Et nunc tibi dico: ₈Signa quae demonstravi et somnia quae vidisti et interpretationes quas tu audisti, in corde tuo repone ea. ₉Tu enim recipieris ab hominibus, et converteris residuum cum Filio meo et cum similibus tuis, usquequo finiantur tempora, ₁₀quoniam saeculum perdidit iuventutem suam et tempora adpropinquant senescere. ₁₁Duodecim enim partibus divisum est saeculum, et transierunt eius decem iam et dimidium decimae partis, ₁₂superant autem eius duae prae medium decimae partis. ₁₃Nunc ergo dispone domum tuam, et corripe populum tuum, et consolare humiles eorum, et renuntia iam corruptae vitae, ₁₄et dimitte abs te mortales cogitationes, et proice abs te pondera humana, et exue te iam infirmam naturam, et repone in unam partem molestissima tibi cogitamenta, et festina transmigrare a temporibus his. ₁₅Quae enim vidisti nunc contigisse mala, iterum horum deteriora facientur, ₁₆quantum enim invalidum fieri saeculum a senectute, tantum multiplicabunt super inhabitantes mala. ₁₇Prolongavit enim magis veritas et adpropinquavit mendacium. Iam enim festinat aquila venire, quam vidisti in visionem.

₁₈Et respondi: Dixi coram te, Domine. ₁₉Ecce enim ego abibo sicut praecepisti mihi, et corripiam praesentem populum. Qui autem iterum nati fuerint, quis commonebit? ₂₀Positum est ergo saeculum in tenebris, et qui inhabitant in eo sine lumine, ₂₁quoniam lex tua incensa est, propter quod nemo scit quae a te facta sunt vel quae incipient operae. ₂₂Si enim inveni gratiam coram te, inmitte in me spiritum sanctum, et scribam omne quod factum est in saeculo ab initio, quae erant in lege tua scripta, ut possint homines invenire semitam, et qui voluerint vivere in novissimis vivant.

₂₃Et respondit ad me et dixit: Vadens congrega populum et dices ad eos, ut non te quaerant diebus quadraginta. ₂₄Tu autem praepara tibi buxos multos et accipe tecum Saream, Dabriam, Selemiam, Ethanum et Asihel, quinque hos qui parati sunt ad scribendum velociter. ₂₅Et venies hic, et ego accendam in corde tuo lucernam intellectus, quae non extinguetur quoadusque finiantur quae incipies scribere. ₂₆Et cum perfeceris, quaedam palam facies, quaedam sapientibus absconse trades. In crastinum enim hac hora incipies scribere.

₂₇Et profectus sum, sicut mihi praecepit, et congregavi omnem populum et dixi: ₂₈Audi, Israhel, verba haec: ₂₉Peregrinantes peregrinati sunt patres nostri ab initio in Aegypto, et liberati sunt inde. ₃₀Et acceperunt legem vitae, quem non custodierunt, quem et vos post eos transgressi estis. ₃₁Et data est vobis terra in sortem in terra Sion, et vos et patres vestri iniquitatem fecistis et non servastis vias, quas vobis praecepit Altissimus. ₃₂Iustus iudex cum sit, abstulit a vobis in tempore quod donaverat. ₃₃Et nunc vos hic estis, et fratres vestri introrsus vestrum sunt. ₃₄Si ergo imperaveritis sensui vestro et erudieritis cor vestrum, vivi conservati eritis et post mortem misericordiam consequemini. ₃₅Iudicium enim post mortem veniet, quando iterum revivescemus, et tunc iustorum nomina parebunt et impiorum facta ostendentur. ₃₆Ad me autem nemo accedat nunc, neque requirent me usque diebus quadraginta.

₃₇Et accepi quinque viros, sicut mandavit mihi, et profecti sumus in campo et mansimus ibi. ₃₈Et factus sum in crastinum, et ecce vox vocavit me dicens: Ezra, aperi os tuum et bibe quod te potiono. ₃₉Et aperui os meum, et ecce calix plenus porrigebatur mihi; hoc erat plenum sicut aqua, color autem eius ut ignis similis. ₄₀Et accepi et bibi, et in eo cum bibissem cor meum eructabatur intellectum et in pectus meum increscebat sapientia. Nam spiritus meus conservabat memoriam, ₄₁et apertum est os meum et non est clausum amplius.

₄₂Altissimus autem dedit intellectum quinque viris, et scripserunt quae dicebantur ex successione notis quas non sciebant, et sederunt quadraginta diebus. Ipsi autem per diem scribebant, ₄₃nocte autem manducabant panem; ego autem per diem loquebar et nocte non tacebam. ₄₄Scripti sunt autem in quadraginta diebus libri nongenti quattuor.

₄₅Et factum est cum conpleti essent quadraginta dies, et locutus est Altissimus dicens: Priora quae scripsisti in palam pone, et legant digni et indigni. ₄₆Novissimos autem septuaginta conservabis, ut tradas eos sapientibus de populo tuo. ₄₇In his enim est vena intellectus et sapientiae fons et scientiae flumen. Et feci sic.