LIBER EZRAE IIII 13

₂Et ecce de mari ventus exsurgebat, ut conturbaret omnes fluctus eius. ₃Et vidi, et ecce convolabat ipse homo cum nubibus caeli. Et ubi vultum suum convertebat ut consideraret, tremebant omnia quae sub eo videbantur. ₄Et ubicumque exiebat vox de ore eius, ardescebant omnes qui audiebant voces eius, sicut liquescit cera quando senserit ignem. ₅Et vidi post haec, et ecce congregabatur multitudo hominum, quorum non erat numerus, de quattuor ventis caeli, ut debellarent hominem qui ascenderat de mari. ₆Et vidi, et ecce sibimet ipso sculpsit montem magnum et volavit super eum. ₇Ego autem quaesivi videre regionem vel locum, unde sculptus esset mons, et non potui.

₈Et post haec vidi, et ecce omnes, qui congregati sunt ad eum ut expugnarent eum, timebant valde, tamen audebant pugnare. ₉Et ecce ut vidit impetum multitudinis venientis, non levavit manum suam neque frameam tenebat neque aliquod vas bellicosum, nisi solummodo vidi, ₁₀quomodo emittit de ore suo sicut fluctum ignis, et de labiis eius spiritum flammae, et de lingua eius emittebat scintillas tempestatis. Et commixta sunt simul omnia haec, fluctus ignis et spiritus flammae et multitudo tempestatis. ₁₁Et concidit super multitudinis impetum quod paratum erat pugnare, et succendit omnes, ut subito nihil videretur de innumerabili multitudine nisi solummodo pulvis cineris et fumi odor. Et vidi et extiti.

₁₂Et post haec vidi ipsum hominem descendentem de monte et advocantem ad se multitudinem aliam pacificam. ₁₃Et accedebant ad eum vultus hominum multorum, quorumdam gaudentium, quorumdam tristantium, aliqui vero alligati, aliqui adducentes ex eis qui offerebantur. Et ego a multitudine pavoris expergefactus sum et deprecatus sum Altissimum et dixi:

₁₄Tu ab initio demonstrasti servo tuo mirabilia haec et dignum me habuisti, ut susciperes deprecationem meam. ₁₅Et nunc demonstra mihi adhuc et interpretationem somnii huius. ₁₆Sicut enim existimo in sensu meo, vae qui derelicti fuerint in diebus illis, et multo plus vae his qui non sunt derelicti. ₁₇Qui enim non sunt derelicti, tristes erunt ₁₈intellegentes quae sunt reposita in novissimis diebus, et non occurrentes eis. Sed et qui derelicti sunt ₁₉propter hoc vae, viderunt enim pericula magna et necessitates multas, sicut ostendunt somnia haec. ₂₀Attamen facilius est periclitantem venire in haec, quam pertransire sicut nubem a saeculo et non videre quae contigerunt in novissimo.

Et respondit ad me et dixit: ₂₁Et visionis interpretationem dicam tibi, sed et de quibus locutus es adaperiam tibi. ₂₂Quoniam dixisti de his qui derelicti sunt et de his qui non derelicti sunt, haec interpretatio: ₂₃Qui adferet periculum in illo tempore, ipse custodibit qui in periculo inciderint, qui habent operas et fidem ad Fortissimum. ₂₄Scito ergo, quoniam magis beatificati sunt qui derelicti super eos qui mortui sunt.

₂₅Interpretatio enim visionis haec: Quia vidisti virum ascendentem de corde maris, ₂₆ipse est quem conservat Altissimus multis temporibus, qui per semet ipsum liberabit creaturam suam, et ipse disponet qui derelicti sunt. ₂₇Et quoniam vidisti de ore eius exire ut spiritum et ignem et tempestatem, ₂₈et quoniam non tenebat frameam neque vas bellicosum, corrumpit enim impetum eius multitudinis quae venerat ad expugnare eum, haec interpretatio: ₂₉Ecce dies veniunt, quando incipiet Altissimus liberare eos qui super terram sunt. ₃₀Et veniet excessus mentis super eos qui inhabitant terram. ₃₁Et in alisalio cogitabunt bellare, civitates civitatem et locus locum et gens ad gentem et regnum adversus regnum.

₃₂Et erit cum fient haec et contingent signa quae ante ostendi tibi, et tunc revelabitur Filius meus quem vidisti virum ascendentem. ₃₃Et erit quando audierint omnes gentes vocem eius, et derelinquet unusquisque regionem suam et bellum quod habent in alterutro, ₃₄et colligetur in unum multitudo innumerabilis, sicut vidisti volentes venire et expugnare eum. ₃₅Ipse autem stabit super cacumen montis Sion. ₃₆Sion autem veniet et ostendetur omnibus parata et aedificata, sicut vidisti montem sculpi sine manibus. ₃₇Ipse autem Filius meus arguet quae advenerunt gentes impietates eorum, has quae tempestati adpropiaverunt, et inproperabit coram eis mala cogitamenta eorum et cruciamenta quibus incipient cruciari, ₃₈quae adsimilatae sunt flammae, et perdet eos sine labore et legem quae igni adsimilata est.

₃₉Et quoniam vidisti eum colligentem ad se aliam multitudinem pacificam, ₄₀haec sunt novem tribus, quae captivae factae sunt de terra sua in diebus Iosiae regis, quem captivum duxit Salmanassar rex Assyriorum, et transtulit eos trans Flumen, et translati sunt in terram aliam. ₄₁Ipsi autem sibi dederunt consilium hoc, ut derelinquerent multitudinem gentium, et proficiscerentur in ulteriorem regionem, ubi numquam quisquam inhabitavit ibi genus humanum. ₄₂ut vel ibi observarent legitima sua, quae non fuerant servantes in regione sua. ₄₃Per introitus autem angustos fluminis Eufraten introierunt. ₄₄Fecit enim eis tunc Altissimus signa, et statuit venas Fluminis usquequo transirent. ₄₅Per eam enim regionem erat via multa itineris anni unius et dimidii, nam regio illa vocatur Arzar, et ₄₆tunc inhabitaverunt ibi usque in novissimo tempore. Et nunc iterum coeperunt venire, ₄₇iterum Altissimus statuit venas Fluminis, ut possint transire, propter hoc vidisti multitudinem collectam cum pace, ₄₈sed et qui derelicti sunt de populo tuo, qui invenientur intra terminum meum ₄₉sanctum. Erit ergo quando incipiet perdere multitudinem earum quae collectae sunt gentes, proteget qui superaverit populum. ₅₀Et tunc ostendet eis multa plurima portenta.

₅₁Et dixi ego: Dominator Domine, hoc mihi ostende, propter quod vidi virum ascendentem de corde maris. Et dixit mihi: ₅₂Sicut non potest hoc vel scrutinare vel scire quis, quid sit in profundo maris, sic non poterit quisquam super terram videre Filium meum vel eos qui cum eo sunt nisi in tempore diei. ₅₃Haec est interpretatio somnii quem vidisti, et propter quod inluminatus es haec solus. ₅₄Dereliquisti enim tua et circa mea vacasti et legem meam exquisisti. ₅₅Vitam enim tuam disposuisti in sapientiam, et sensum tuum vocasti matrem. ₅₆Et propter hoc ostendi tibi haec, merces apud Altissimum. Erit enim post alios tres dies, ad te alia loquar et exponam tibi gravia et mirabilia.

₅₇Et profectus sum et transii in campum, multum glorificans et laudans Altissimum de mirabilibus, quae per tempus faciebat, ₅₈et quoniam gubernat tempora et quae sunt in temporibus inlata. Et sedi ibi tribus diebus.