LIBER EZRAE IIII 11

₁₂Et vidi, et ecce a dextera parte surrexit una pinna et regnavit super omnem terram. ₁₃Et factum est cum regnaret, et venit ei finis et non apparuit, ita ut non appareret locus eius. Et sequens exsurrexit et regnabat et ipsa multum tenuit tempus. ₁₄Et factum est cum regnaret, et veniebat finis eius, ut non appareret sicut prior. ₁₅Et ecce vox emissa est illi dicens: ₁₆Audi, tu quae toto tempore tenuisti terram, hoc adnuntii, antequam incipias non parere: ₁₇Nemo post te tenebit tempus tuum, sed nec dimidium eius. ₁₈Et levavit se tertia et tenuit principatum sicut priores, et non apparuit et ipsa. ₁₉Et sic contingebat omnibus alis singillatim principatum gerere et iterum nusquam conparere. ₂₀Et vidi, et ecce in tempore sequentes pinnae erigebantur et ipsae a dextera parte, ut tenerent et ipsae principatum; et ex his erant quae tenebant, sed tamen statim non conparescebant. ₂₁Nam et aliquae ex eis erigebantur, sed non tenebant principatum. ₂₂Et vidi post haec, et ecce non conparuerunt duodecim pinnae et duo pinnacula. ₂₃Et nihil superavit in corpore aquilae nisi tria capita quiescentia et sex pinnacula.

₂₄Et vidi, et ecce de sex pinnaculis divisa sunt duo et manserunt sub capite quod est ad dexteram partem; nam quattuor manserunt in loco suo. ₂₅Et vidi, et ecce hae subalares cogitabant se erigere et tenere principatus. ₂₆Et vidi, et ecce una erecta est, sed statim non conparuit. ₂₇Et secunda, et haec velocius quam prior non conparuit. ₂₈Et vidi, et ecce duae quae superaverunt apud semet ipsas cogitabant et ipsae regnare. ₂₉Et in eo cum cogitarent, et ecce unum de quiescentium capitum, quod erat medium, evigilabat, hoc enim erat duorum capitum maior. ₃₀Et vidi, quomodo conplexa est duo capita secum, ₃₁et ecce conversum est caput cum his qui cum ea erant et comedit duas subalares quae cogitabant regnare. ₃₂Hoc autem caput percontinuit omnem terram et dominavit qui inhabitant in ea cum labore multo, et potentatum tenuit orbem terrarum super omnes alas quae fuerunt. ₃₃Et vidi post haec, et ecce medium caput subito non conparuit, et hoc sicut alae. ₃₄Superaverunt autem duo capita, quae et ipsa similiter regnaverunt super terram et super eos qui habitant in ea. ₃₅Et vidi, et ecce devoravit caput a dextera parte illud quod est a leva. ₃₆Et audivi vocem dicentem mihi: Conspice contra te et considera quod vides. ₃₇Et vidi, et ecce sicut leo suscitatus de silva mugiens, et audivi quomodo emisit vocem hominis ad aquilam et dixit dicens: ₃₈Audi tu, et loquar ad te, et dicit Altissimus tibi: ₃₉Nonne tu es, quae superasti de quattuor animalibus quae feceram regnare saeculi mei, et ut per eos veniret finis temporum meorum? ₄₀Et quartus veniens devicit omnia animalia quae transierunt, et potentatum tenens saeculum cum tremore multo et omnem orbem cum labore pessimo, et inhabitabant tot temporibus orbem terrarum cum dolo. ₄₁Et iudicasti terram non cum veritate. ₄₂Tribulasti enim mansuetos et laesisti quiescentes, odisti verum dicentes et dilexisti mendaces, et destruxisti habitationes eorum qui fructificabant, et humiliasti muros eorum qui te non nocuerunt. ₄₃Et ascendit contumelia ad Altissimum et superbia tua ad Fortem. ₄₄Et respexit Altissimus super sua tempora, et ecce finita sunt et saecula eius conpleta sunt. ₄₅Propterea non apparens non appareas, tu aquila et alae tuae horribiles et pinnacula tua pessima et capita tua maligna et ungues tui pessimi et omne corpus tuum vanum, ₄₆uti refrigeret omnis terra et relevetur liberata de tua vi et speret iudicium et misericordiam eius qui fecit eam.