AD CORINTHIOS II 13

₁ecce tertio hoc venio ad vos

in ore duorum vel trium testium stabit omne verbum

₂praedixi et praedico ut praesens bis et nunc absens

his qui ante peccaverunt et ceteris omnibus

quoniam si venero iterum non parcam

₃an experimentum quaeritis eius qui in me loquitur Christi

qui in vos non infirmatur sed potens est in vobis

₄nam et si crucifixus est ex infirmitate

sed vivit ex virtute Dei

nam et nos infirmi sumus in illo

sed vivemus cum eo ex virtute Dei in vobis

₅vosmet ipsos temptate si estis in fide ipsi vos probate

an non cognoscitis vos ipsos

quia Christus Iesus in vobis est

nisi forte reprobi estis

₆spero autem quod cognoscetis quia nos non sumus reprobi

₇oramus autem Deum ut nihil mali faciatis

non ut nos probati pareamus

sed ut vos quod bonum est faciatis

nos autem ut reprobi simus

₈non enim possumus aliquid adversus veritatem

sed pro veritate

₉gaudemus enim quando nos infirmi sumus

vos autem potentes estis

hoc et oramus vestram consummationem

₁₀ideo haec absens scribo ut non praesens durius agam

secundum potestatem quam Dominus dedit mihi

in aedificationem et non in destructionem

₁₁de cetero fratres gaudete

perfecti estote exhortamini idem sapite pacem habete

et Deus dilectionis et pacis erit vobiscum

₁₂salutate invicem in osculo sancto

salutant vos sancti omnes

₁₃gratia Domini nostri Iesu Christi et caritas Dei

et communicatio Sancti Spiritus cum omnibus

vobis amen