AD THESSALONICENSES I 1

₁Paulus et Silvanus et Timotheus ecclesiae Thessalonicensium

in Deo Patre et Domino Iesu Christo gratia vobis et pax

₂gratias agimus Deo semper pro omnibus vobis

memoriam facientes in orationibus nostris sine

intermissione

₃memores operis fidei vestrae et laboris et caritatis

et sustinentiae spei Domini nostri Iesu Christi

ante Deum et Patrem nostrum

₄scientes fratres dilecti a Deo electionem vestram

₅quia evangelium nostrum non fuit ad vos in sermone tantum

sed et in virtute et in Spiritu Sancto et in plenitudine multa

sicut scitis quales fuerimus vobis

propter vos

₆et vos imitatores nostri facti estis et Domini

excipientes verbum in tribulatione multa

cum gaudio Spiritus Sancti

₇ita ut facti sitis forma omnibus credentibus

in Macedonia et in Achaia

₈a vobis enim diffamatus est sermo Domini

non solum in Macedonia et in Achaia

sed in omni loco fides vestra quae est ad Deum profecta est

ita ut non sit nobis necesse quicquam loqui

₉ipsi enim de nobis adnuntiant

qualem introitum habuerimus ad vos

et quomodo conversi estis ad Deum a simulacris

servire Deo vivo et vero

₁₀et expectare Filium eius de caelis

quem suscitavit ex mortuis Iesum

qui eripuit nos ab ira ventura