LIBER I MACCHABEORUM 9

₁interea ubi audivit Demetrius

quia cecidit Nicanor et exercitus eius in proelio

adposuit Bacchidem et Alchimum rursum mittere in Iudaeam

et dextrum cornu cum illis

₂et abierunt viam quae ducit in Galgala

et castra posuerunt in Mesaloth quae est in Arbellis

et occupaverunt eam et peremerunt animas hominum multas

₃et mense primo anni centesimi quinquagesimi et secundi

adplicuerunt exercitum ad Hierusalem

₄et surrexerunt et abierunt in Berea

viginti milia virorum et duo milia equitum

₅et Iudas castra posuerat in Laisa

et tria milia viri cum eo electi

₆et viderunt multitudinem exercitus quia multi sunt

et timuerunt valde et multi subtraxerunt se de castris

et non remanserunt ex eis nisi octingenti viri

₇et vidit Iudas quod defluxit exercitus suus

et bellum perurguebat eum

confractus est corde quia non habebat tempus congregandi eos

et dissolutus est

₈et dixit his qui residui erant

surgamus et eamus ad adversarios nostros

si poterimus pugnare adversus eos

₉et avertebant eum dicentes

non poterimus sed liberemus animas nostras modo

et revertemur ad fratres nostros

et pugnabimus adversus eos

nos autem pauci sumus

₁₀et ait Iudas absit istam rem facere ut fugiamus ab eis

et si adpropiavit tempus nostrum

moriamur in virtute propter fratres nostros

et non inferamus crimen gloriae nostrae

₁₁et movit exercitus de castris et steterunt illis obviam

et divisi sunt equites in duas partes

et fundibalarii et sagittarii praeibant exercitum

et primi certaminis omnes potentes

₁₂Bacchides autem erat in dextro cornu

et proximavit legio ex duabus partibus

et clamabant tubis

₁₃exclamaverunt autem et hii qui erant ex parte Iudae etiam ipsi

et commota est terra a voce exercituum

et commissum est proelium a mane usque ad vesperam

₁₄et vidit Iudas quia firmior est pars exercitus Bacchidis in

dextris

et convenerunt cum ipso omnes constantes corde

₁₅et contrita est dextra pars ab eis

et persecutus est eos usque ad montem Azoti

₁₆et qui in sinistro cornu erant

viderunt quod contritum est dextrum cornu

et secuti sunt post Iudam et qui cum ipso erant a tergo

₁₇et ingravatum est proelium

et ceciderunt vulnerati multi ex his et illis

₁₈et Iudas cecidit et ceteri fugerunt

₁₉et Ionathas et Simon tulerunt Iudam fratrem suum in Modin

₂₀et fleverunt eum omnis populus Israhel planctu magno

et lugebant dies multos

₂₁et dixerunt

quomodo cecidit potens qui salvum faciebat Israhel

₂₂et cetera verba Iudae bellorum et virtutum quas

fecit

non sunt descripta

multa enim erant valde

₂₃et factum est post obitum Iudae

emerserunt iniqui in omnibus finibus Israhel

et exorti sunt omnes qui operabantur iniquitatem

₂₄in diebus illis facta est fames magna valde

et tradidit se Bacchidi omnis regio eorum cum ipsis

₂₅et elegit Bacchides impios viros

et constituit eos dominos regionis

₂₆et exquirebant et perscrutabantur amicos Iudae

et adducebant eos ad Bacchidem et vindicabat in illos et inludebat

₂₇et facta est tribulatio magna in Israhel

qualis non fuit ex qua die non est visus propheta in

Israhel

₂₈et congregati sunt omnes amici Iudae et dixerunt Ionathae

₂₉ex quo frater tuus Iudas defunctus est

vir similis ei non est qui exeat contra inimicos

Bacchidem et eos qui inimici sunt genti nostrae

₃₀nunc itaque te elegimus hodie esse nobis principem

et ducem ad bellandum bellum nostrum

₃₁et suscepit Ionathas tempore illo principatum

et surrexit loco Iudae fratris sui

₃₂et cognovit Bacchides et quaerebat eum occidere

₃₃et cognovit Ionathas et Simon frater eius et omnes qui cum eo erant

et fugerunt in desertum Thecuae

et consederunt ad aquam lacus Asphar

₃₄et cognovit Bacchides

et die sabbatorum venit ipse et omnis exercitus eius trans Iordanem

₃₅et misit fratrem suum ducem populi

et rogavit Nabatheos amicos suos

ut commendaret illis adparatum suum qui erat copiosus

₃₆et exierunt filii Iambri ex Madabas

et conprehenderunt Iohannem et omnia quae habebat

et abierunt habentes ea

₃₇post haec verba renuntiatum est Ionathae et Simoni

fratri eius

quia filii Iambri faciunt nuptias magnas

et ducunt sponsam ex Nadaba

filiam unius de magnis principibus Chanaan

cum ambitione magna

₃₈et recordati sunt sanguinis Iohannis fratris sui

et ascenderunt et absconderunt se sub tegumento montis

₃₉et levaverunt oculos suos et viderunt

et ecce tumultus et adparatus multus

et sponsus processit et amici eius et fratres eius obviam

illis

cum tympanis et musicis et armis multis

₄₀et surrexerunt ad eos cum insidiis et occiderunt eos

et ceciderunt multi vulnerati

et residui fugerunt in montem

et acceperunt omnia spolia eorum

₄₁et conversae sunt nuptiae in luctum

et vox musicorum ipsorum in lamentum

₄₂et vindicaverunt vindicta sanguinem fratris

sui

et reversi sunt ad ripam Iordanis

₄₃et audivit Bacchides

et venit die sabbatorum usque ad oram Iordanis

in virtute multa

₄₄et dixit ad suos Ionathas

surgamus et pugnemus contra inimicos nostros

non est enim hodie sicut heri et nudius tertius

₄₅ecce enim bellum ex adverso

aqua vero Iordanis hinc et inde et ripae et paludes et saltus

et non est locus devertendi

₄₆nunc ergo clamate in caelum

ut liberemini de manu inimicorum vestrorum

et commissum est bellum

₄₇et extendit Ionatha manum suam percutere

Bacchidem

et devertit ab eo retro

₄₈et desiluit Ionathan

et transnataverunt ad eos Iordanem

₄₉et ceciderunt de parte Bacchidis die illa mille viri

et reversi sunt Hierusalem

₅₀et aedificaverunt civitates munitas in Iudaea

munitionem quae erat in Hiericho

et in Ammaum et in Bethoron et Bethel

et Tamnatan et Phara et Thopo

muris excelsis et portis et seris

₅₁et posuit custodiam in eis ut inimicitias exercerent in Israhel

₅₂et munivit civitatem Bethsuram et Gazara et arcem

et posuit in eis auxilia et adparatum escarum

₅₃et accepit filios principum regionis obsides

et posuit eos in arce in Hierusalem in custodia

₅₄et anno centesimo quinquagesimo tertio mense secundo

praecepit Alchimus destrui muros domus sanctae interioris

et destrui opera prophetarum et coepit destruere

₅₅in tempore illo percussus est Alchimus et inpedita sunt opera illius

et obclusum est os eius et dissolutus est paralysin

nec ultra loqui potuit verbum et mandare de domo sua

₅₆et mortuus est Alchimus in tempore illo cum tormento magno

₅₇et vidit Bacchides quoniam mortuus est Alchimus

et reversus est ad regem et siluit terra annis duobus

₅₈et cogitaverunt omnes iniqui dicentes

ecce Ionathas et qui cum eo sunt

in silentio habitant confidentes

nunc ergo adducamus Bacchidem

et conprehendet eos omnes in una nocte

₅₉et abierunt et consilium ei dederunt

₆₀et surrexit ut veniret cum exercitu multo

et misit occulte epistulas sociis suis qui erant in Iudaea

ut conprehenderent Ionathan et eos qui cum eo erant

sed non potuerunt quia innotuit eis consilium eorum

₆₁et adprehendit de viris regionis qui principes erant malitiae

quinquaginta viros

et occidit eos

₆₂et secessit Ionathas et Simon et qui cum eo erant

in Bethbessi quae est in deserto

et struxit diruta eius et firmaverunt eam

₆₃et agnovit Bacchides

et congregavit universam multitudinem suam

et his qui de Iuda erant denuntiavit

₆₄et venit et castra posuit desuper a Bethbesse

et obpugnavit eam dies multos et fecit machinas

₆₅et reliquit Ionathas Simonem fratrem suum in civitate

et exiit in regionem

et venit cum numero

₆₆et percussit Odaren et fratres eius

et filios Phaseron in tabernaculo ipsorum

et coepit caedere et crescere in virtutibus

₆₇Simon vero et qui cum ipso erant

exierunt de civitate et succenderunt machinas

₆₈et pugnaverunt contra Bacchidem et contritus est ab eis

et adflixerunt eum valde

quoniam consilium eius et congressus eius erat inanis

₆₉et iratus contra viros iniquos

qui ei consilium dederant ut veniret in regionem ipsorum

multos ex eis occidit

ipse autem cogitavit cum reliquis abire in regionem suam

₇₀et cognovit Ionathas et misit ad eum legatos

conponere cum ipso pacem et reddere ei captivitatem

₇₁et libenter accepit et fecit secundum verba eius

et iuravit nihil se ei facturum mali

omnibus diebus vitae eius

₇₂et reddidit ei captivitatem quam prius erat praedatus de terra Iuda

et conversus abiit in terram suam

et non adposuit amplius venire in fines eius

₇₃et cessavit gladius ex Israhel

et habitavit Ionathas in Machemas

et coepit Ionathas ibi iudicare populum

et exterminavit impios ex Israhel