LIBER I MACCHABEORUM 13

₁et audivit Simon quod congregavit Tryfon exercitum copiosum

ut veniret in terram Iuda et adtereret eam

₂videns quia in tremore populus est et timore

ascendit Hierusalem et congregavit populum

₃et adhortans dixit

vos scitis quanta ego et fratres mei et domus patris mei

fecimus pro legibus et pro sanctis proelia

et angustias quales vidimus

₄horum gratia perierunt fratres mei omnes propter Israhel

et relictus sum ego solus

₅et nunc non mihi contingat parcere animae meae

in omni tempore tribulationis

non enim melior sum fratribus meis

₆vindicabo itaque gentem meam et sancta

natosque vestros et uxores

quia congregatae sunt universae gentes

conterere nos inimicitiae gratis

₇et accensus est spiritus populi simul ut audivit sermones istos

₈et responderunt voce magna dicentes

tu es dux noster loco Iudae et Ionathae fratris tui

₉pugna proelium nostrum

et omnia quaecumque dixeris nobis faciemus

₁₀et congregans omnes viros bellatores

adceleravit consummare omnes muros Hierusalem

et munivit eam in gyro

₁₁et misit Ionathan filium Absalomi

et cum eo exercitum novum in Ioppen

et eiectis his qui erant in ea mansit illic ipse

₁₂et movit Tryfon a Ptolomaida cum exercitu multo

ut veniret in terram Iuda

et Ionatha cum eo in custodia

₁₃Simon autem adplicuit in Addus contra faciem campi

₁₄et ut cognovit Tryfon

quia surrexit Simon in loco Ionathae fratris sui

misit ad eum legatos

₁₅dicens

pro argento quod debebat frater tuus Ionathas

in ratione regis

detinuimus eum

₁₆et nunc mitte argenti talenta centum

et duos filios eius obsides ut non dimissus fugiat a nobis

et remittemus eum

₁₇et cognovit Simon quia cum dolo loquitur secum

iussit tamen dari argentum et pueros

ne inimicitiam magnam sumeret ad Israhel populum dicentem

₁₈quia non misit argentum et pueros propterea periit

₁₉et mentitus est et non dimisit Ionathan

₂₀et post haec venit Tryfon intra regionem

ut contereret eam

et gyraverunt per viam quae ducit Ador

et Simon et castra eius ambulabant in omnem locum quocumque ibant

₂₁qui autem in arce erant miserunt ad Tryfonem legatos

ut festinaret venire per desertum et mitteret illis

alimonias

₂₂et paravit Tryfon omnem equitatum ut veniret illa nocte

erat autem nix valde multa et non venit in Galaditin

₂₃et cum adpropiasset Baschama

occidit Ionathan et filios eius

₂₄et convertit Tryfon et abiit in terram suam

₂₅et misit Simon et accepit ossa Ionathae fratris sui

et sepelivit ea in Modin civitate patrum eius

₂₆et planxerunt eum omnis Israhel planctu magno

et luxerunt eum dies multos

₂₇et aedificavit Simon

super sepulchrum patris sui et fratrum suorum

aedificium altum visu lapide polito retro et ante

₂₈et statuit septem pyromidas

unam contra unam patri et matri et quattuor fratribus

₂₉et his circumposuit columnas magnas

et super columnas arma ad memoriam aeternam

et iuxta arma naves sculptas

quae viderentur ab omnibus navigantibus mare

₃₀hoc est sepulchrum quod fecit in Modin usque in hunc diem

₃₁Tryfon autem cum iter faceret cum Antiocho rege adulescente

dolo occidit eum

₃₂et regnavit loco eius

et inposuit sibi diadema Asiae

et fecit plagam magnam in terra

₃₃et aedificavit Simon praesidia Iudaeae

muniens ea turribus excelsis et muris magnis et portis et seris

et posuit alimenta in munitionibus

₃₄et elegit Simon viros et misit ad Demetrium regem

ut faceret remissionem regioni

quia actus omnes Tryfonis per direptionem fuerant gesti

₃₅et Demetrius rex ad verba ista respondit

et scripsit epistulam talem

₃₆rex Demetrius Simoni summo sacerdoti et amico regum

et senioribus et genti Iudaeorum salutem

₃₇coronam auream et baen quam misistis

suscepimus

et parati sumus facere vobiscum pacem magnam

et scribere praepositis regis remittere vobis quae indulsimus

₃₈quaecumque enim constituimus vobis constant

munitiones quas aedificastis sint vobis

₃₉remittimus quoque ignorantias et peccata usque in hodiernum diem

et coronam quam debebatis

et si quid aliud erat tributarium Hierusalem

iam non sit tributarium

₄₀et si qui in vobis apti sunt conscribi

inter nostros conscribantur et sit inter nos pax

₄₁anno centesimo septuagesimo

ablatum est iugum gentium ab Israhel

₄₂et coepit populus Israhel scribere in tabulis et gestis publicis

anno primo sub Simone sacerdote magno duce et

principe Iudaeorum

₄₃in illis diebus Simon adplicuit ad Gazam

et circumdedit eam castris

et fecit machinas et adplicuit ad civitatem

et percussit turrem unam et conprehendit

₄₄et qui eruperunt erant intra machinam in

civitate

et factus est motus magnus in civitate

₄₅et ascenderunt qui erant in civitate cum uxoribus et filiis

supra murum scissis tunicis suis

et clamaverunt voce magna postulantes a Simone dextras sibi dari

₄₆et dixerunt non nobis reddas secundum malitias nostras

sed secundum misericordias tuas

₄₇et flexus Simon non debellavit eos eiecit tamen eos de civitate

et emundavit aedes in quibus fuerant simulacra

et tunc intravit in ea cum hymnis benedicens Dominum

₄₈et eiecta ex ea omni inmunditia

conlocavit in ea viros qui legem facerent et munivit eam

et fecit sibi habitationem

₄₉qui autem erant in arce Hierusalem

prohibebantur egredi et ingredi in regionem

et emere ac vendere

et esurierunt valde et multi ex eis fame perierunt

₅₀et clamaverunt ad Simonem ut dextras acciperent et dedit illis

et eiecit eos inde et mundavit arcem a contaminationibus

₅₁et intraverunt in ea tertia et vicesima

secundi mensis

anno centesimo septuagesimo primo

cum laude et ramis palmarum

et cinyris et cymbalis et nablis et hymnis et canticis

quia contritus est inimicus magnus ex Israhel

₅₂et constituit ut omnibus annis agerentur dies hii cum laetitia

₅₃et munivit montem templi qui erat secus arcem

et habitavit ibi ipse et qui cum eo erant

₅₄et vidit Simon Iohannem filium suum

quod vir esset

et posuit eum ducem virtutum universarum

et habitavit Gazaris