SIRACIDES 35

₁Ὁ συντηρῶν νόμον πλεονάζει προσφοράς,

θυσιάζων σωτηρίου ὁ προσέχων ἐντολαῖς.

₂ἀνταποδιδοὺς χάριν προσφέρων σεμίδαλιν,

καὶ ὁ ποιῶν ἐλεημοσύνην θυσιάζων αἰνέσεως.

₃εὐδοκία κυρίου ἀποστῆναι ἀπὸ πονηρίας,

καὶ ἐξιλασμὸς ἀποστῆναι ἀπὸ ἀδικίας.

₄μὴ ὀφθῇς ἐν προσώπῳ κυρίου κενός·

πάντα γὰρ ταῦτα χάριν ἐντολῆς.

₅προσφορὰ δικαίου λιπαίνει θυσιαστήριον,

καὶ ἡ εὐωδία αὐτῆς ἔναντι ὑψίστου.

₆θυσία ἀνδρὸς δικαίου δεκτή,

καὶ τὸ μνημόσυνον αὐτῆς οὐκ ἐπιλησθήσεται.

₇ἐν ἀγαθῷ ὀφθαλμῷ δόξασον τὸν κύριον

καὶ μὴ σμικρύνῃς ἀπαρχὴν χειρῶν σου.

₈ἐν πάσῃ δόσει ἱλάρωσον τὸ πρόσωπόν σου

καὶ ἐν εὐφροσύνῃ ἁγίασον δεκάτην.

₉δὸς ὑψίστῳ κατὰ τὴν δόσιν αὐτοῦ

καὶ ἐν ἀγαθῷ ὀφθαλμῷ καθ᾽ εὕρεμα χειρός·

₁₀ὅτι κύριος ἀνταποδιδούς ἐστιν

καὶ ἑπταπλάσια ἀνταποδώσει σοι.

₁₁Μὴ δωροκόπει, οὐ γὰρ προσδέξεται,

καὶ μὴ ἔπεχε θυσίᾳ ἀδίκῳ·

₁₂ὅτι κύριος κριτής ἐστιν,

καὶ οὐκ ἔστιν παρ᾽ αὐτῷ δόξα προσώπου.

₁₃οὐ λήμψεται πρόσωπον ἐπὶ πτωχοῦ

καὶ δέησιν ἠδικημένου εἰσακούσεται·

₁₄οὐ μὴ ὑπερίδῃ ἱκετείαν ὀρφανοῦ

καὶ χήραν, ἐὰν ἐκχέῃ λαλιάν·

₁₅οὐχὶ δάκρυα χήρας ἐπὶ σιαγόνα καταβαίνει

καὶ ἡ καταβόησις ἐπὶ τῷ καταγαγόντι αὐτά;

₁₆θεραπεύων ἐν εὐδοκίᾳ δεχθήσεται,

καὶ ἡ δέησις αὐτοῦ ἕως νεφελῶν συνάψει·

₁₇προσευχὴ ταπεινοῦ νεφέλας διῆλθεν,

καὶ ἕως συνεγγίσῃ, οὐ μὴ παρακληθῇ·

₁₈καὶ οὐ μὴ ἀποστῇ, ἕως ἐπισκέψηται ὁ ὕψιστος

καὶ κρινεῖ δικαίοις καὶ ποιήσει κρίσιν.

₁₉καὶ ὁ κύριος οὐ μὴ βραδύνῃ

οὐδὲ μὴ μακροθυμήσῃ ἐπ᾽ αὐτοῖς,

₂₀ἕως ἂν συντρίψῃ ὀσφὺν ἀνελεημόνων

καὶ τοῖς ἔθνεσιν ἀνταποδώσει ἐκδίκησιν,

₂₁ἕως ἐξάρῃ πλῆθος ὑβριστῶν

καὶ σκῆπτρα ἀδίκων συντρίψει,

₂₂ἕως ἀνταποδῷ ἀνθρώπῳ κατὰ τὰς πράξεις αὐτοῦ

καὶ τὰ ἔργα τῶν ἀνθρώπων κατὰ τὰ ἐνθυμήματα αὐτῶν,

₂₃ἕως κρίνῃ τὴν κρίσιν τοῦ λαοῦ αὐτοῦ

καὶ εὐφρανεῖ αὐτοὺς ἐν τῷ ἐλέει αὐτοῦ.

₂₄ὡραῖον ἔλεος ἐν καιρῷ θλίψεως αὐτοῦ

ὡς νεφέλαι ὑετοῦ ἐν καιρῷ ἀβροχίας.