PSALMI SALOMONIS 13

₁Δεξιὰ κυρίου ἐσκέπασέν με,

δεξιὰ κυρίου ἐφείσατο ἡμῶν·

₂ὁ βραχίων κυρίου ἔσωσεν ἡμᾶς ἀπὸ ῥομφαίας διαπορευομένης,

ἀπὸ λιμοῦ καὶ θανάτου ἁμαρτωλῶν.

₃θηρία ἐπεδράμοσαν αὐτοῖς πονηρά·

ἐν τοῖς ὀδοῦσιν αὐτῶν ἐτίλλοσαν σάρκας αὐτῶν

καὶ ἐν ταῖς μύλαις ἔθλων ὀστᾶ αὐτῶν·

₄καὶ ἐκ τούτων ἁπάντων ἐρρύσατο ἡμᾶς κύριος.

₅Ἐταράχθη ὁ εὐσεβὴς διὰ τὰ παραπτώματα αὐτοῦ,

μήποτε συμπαραληφθῇ μετὰ τῶν ἁμαρτωλῶν·

₆ὅτι δεινὴ ἡ καταστροφὴ τοῦ ἁμαρτωλοῦ,

καὶ οὐχ ἅψεται δικαίου οὐδὲν ἐκ πάντων τούτων.

₇ὅτι οὐχ ὁμοία ἡ παιδεία τῶν δικαίων ἐν ἀγνοίᾳ

καὶ ἡ καταστροφὴ τῶν ἁμαρτωλῶν.

₈ἐν περιστολῇ παιδεύεται δίκαιος,

ἵνα μὴ ἐπιχαρῇ ὁ ἁμαρτωλὸς τῷ δικαίῳ·

₉ὅτι νουθετήσει δίκαιον ὡς υἱὸν ἀγαπήσεως,

καὶ ἡ παιδεία αὐτοῦ ὡς πρωτοτόκου.

₁₀ὅτι φείσεται κύριος τῶν ὁσίων αὐτοῦ

καὶ τὰ παραπτώματα αὐτῶν ἐξαλείψει ἐν παιδείᾳ.

₁₁ἡ γὰρ ζωὴ τῶν δικαίων εἰς τὸν αἰῶνα·

ἁμαρτωλοὶ δὲ ἀρθήσονται εἰς ἀπώλειαν,

καὶ οὐχ εὑρεθήσεται μνημόσυνον αὐτῶν ἔτι·

₁₂ἐπὶ δὲ τοὺς ὁσίους τὸ ἔλεος κυρίου,

καὶ ἐπὶ τοὺς φοβουμένους αὐτὸν τὸ ἔλεος αὐτοῦ.