PSALMI SALOMONIS 11

₁Σαλπίσατε ἐν Σιων ἐν σάλπιγγι σημασίας ἁγίων,

κηρύξατε ἐν Ιερουσαλημ φωνὴν εὐαγγελιζομένου·

ὅτι ἠλέησεν ὁ θεὸς Ισραηλ ἐν τῇ ἐπισκοπῇ αὐτῶν.

₂στῆθι, Ιερουσαλημ, ἐφ᾽ ὑψηλοῦ καὶ ἰδὲ τὰ τέκνα σου

ἀπὸ ἀνατολῶν καὶ δυσμῶν συνηγμένα εἰς ἅπαξ ὑπὸ κυρίου.

₃ἀπὸ βορρᾶ ἔρχονται τῇ εὐφροσύνῃ τοῦ θεοῦ αὐτῶν,

ἐκ νήσων μακρόθεν συνήγαγεν αὐτοὺς ὁ θεός.

₄ὄρη ὑψηλὰ ἐταπείνωσεν εἰς ὁμαλισμὸν αὐτοῖς,

οἱ βουνοὶ ἐφύγοσαν ἀπὸ εἰσόδου αὐτῶν·

₅οἱ δρυμοὶ ἐσκίασαν αὐτοῖς ἐν τῇ παρόδῳ αὐτῶν,

πᾶν ξύλον εὐωδίας ἀνέτειλεν αὐτοῖς ὁ θεός,

₆ἵνα παρέλθῃ Ισραηλ ἐν ἐπισκοπῇ δόξης θεοῦ αὐτῶν.

₇Ἔνδυσαι, Ιερουσαλημ, τὰ ἱμάτια τῆς δόξης σου,

ἑτοίμασον τὴν στολὴν τοῦ ἁγιάσματός σου·

ὅτι ὁ θεὸς ἐλάλησεν ἀγαθὰ Ισραηλ εἰς τὸν αἰῶνα καὶ ἔτι.

₈ποιήσαι κύριος ἃ ἐλάλησεν ἐπὶ Ισραηλ καὶ Ιερουσαλημ,

ἀναστήσαι κύριος τὸν Ισραηλ ἐν ὀνόματι δόξης αὐτοῦ·

₉τοῦ κυρίου τὸ ἔλεος ἐπὶ τὸν Ισραηλ εἰς τὸν αἰῶνα καὶ ἔτι.