PSALMI 94

Δεῦτε ἀγαλλιασώμεθα τῷ κυρίῳ,

ἀλαλάξωμεν τῷ θεῷ τῷ σωτῆρι ἡμῶν·

₂προφθάσωμεν τὸ πρόσωπον αὐτοῦ ἐν ἐξομολογήσει

καὶ ἐν ψαλμοῖς ἀλαλάξωμεν αὐτῷ.

₃ὅτι θεὸς μέγας κύριος

καὶ βασιλεὺς μέγας ἐπὶ πάντας τοὺς θεούς·

₄ὅτι ἐν τῇ χειρὶ αὐτοῦ τὰ πέρατα τῆς γῆς,

καὶ τὰ ὕψη τῶν ὀρέων αὐτοῦ εἰσιν·

₅ὅτι αὐτοῦ ἐστιν ἡ θάλασσα, καὶ αὐτὸς ἐποίησεν αὐτήν,

καὶ τὴν ξηρὰν αἱ χεῖρες αὐτοῦ ἔπλασαν.

₆δεῦτε προσκυνήσωμεν καὶ προσπέσωμεν αὐτῷ

καὶ κλαύσωμεν ἐναντίον κυρίου τοῦ ποιήσαντος ἡμᾶς·

₇ὅτι αὐτός ἐστιν ὁ θεὸς ἡμῶν,

καὶ ἡμεῖς λαὸς νομῆς αὐτοῦ

καὶ πρόβατα χειρὸς αὐτοῦ.

σήμερον, ἐὰν τῆς φωνῆς αὐτοῦ ἀκούσητε,

₈μὴ σκληρύνητε τὰς καρδίας ὑμῶν ὡς ἐν τῷ παραπικρασμῷ

κατὰ τὴν ἡμέραν τοῦ πειρασμοῦ ἐν τῇ ἐρήμῳ,

₉οὗ ἐπείρασαν οἱ πατέρες ὑμῶν,

ἐδοκίμασαν καὶ εἴδοσαν τὰ ἔργα μου.

₁₀τεσσαράκοντα ἔτη προσώχθισα τῇ γενεᾷ ἐκείνῃ

καὶ εἶπα Ἀεὶ πλανῶνται τῇ καρδίᾳ

καὶ αὐτοὶ οὐκ ἔγνωσαν τὰς ὁδούς μου,

₁₁ὡς ὤμοσα ἐν τῇ ὀργῇ μου

Εἰ εἰσελεύσονται εἰς τὴν κατάπαυσίν μου.