PSALMI 66

₂Ὁ θεὸς οἰκτιρήσαι ἡμᾶς καὶ εὐλογήσαι ἡμᾶς,

ἐπιφάναι τὸ πρόσωπον αὐτοῦ ἐφ᾽ ἡμᾶς

διάψαλμα

₃τοῦ γνῶναι ἐν τῇ γῇ τὴν ὁδόν σου,

ἐν πᾶσιν ἔθνεσιν τὸ σωτήριόν σου.

₄ἐξομολογησάσθωσάν σοι λαοί, ὁ θεός,

ἐξομολογησάσθωσάν σοι λαοὶ πάντες.

₅εὐφρανθήτωσαν καὶ ἀγαλλιάσθωσαν ἔθνη,

ὅτι κρινεῖς λαοὺς ἐν εὐθύτητι

καὶ ἔθνη ἐν τῇ γῇ ὁδηγήσεις.

διάψαλμα.

₆ἐξομολογησάσθωσάν σοι λαοί, ὁ θεός,

ἐξομολογησάσθωσάν σοι λαοὶ πάντες.

₇γῆ ἔδωκεν τὸν καρπὸν αὐτῆς·

εὐλογήσαι ἡμᾶς ὁ θεὸς ὁ θεὸς ἡμῶν.

₈εὐλογήσαι ἡμᾶς ὁ θεός,

καὶ φοβηθήτωσαν αὐτὸν πάντα τὰ πέρατα τῆς γῆς.