PSALMI 46

₂Πάντα τὰ ἔθνη, κροτήσατε χεῖρας,

ἀλαλάξατε τῷ θεῷ ἐν φωνῇ ἀγαλλιάσεως,

₃ὅτι κύριος ὕψιστος φοβερός,

βασιλεὺς μέγας ἐπὶ πᾶσαν τὴν γῆν.

₄ὑπέταξεν λαοὺς ἡμῖν

καὶ ἔθνη ὑπὸ τοὺς πόδας ἡμῶν·

₅ἐξελέξατο ἡμῖν τὴν κληρονομίαν αὐτοῦ,

τὴν καλλονὴν Ιακωβ, ἣν ἠγάπησεν.

διάψαλμα.

₆ἀνέβη ὁ θεὸς ἐν ἀλαλαγμῷ,

κύριος ἐν φωνῇ σάλπιγγος.

₇ψάλατε τῷ θεῷ ἡμῶν, ψάλατε,

ψάλατε τῷ βασιλεῖ ἡμῶν, ψάλατε,

₈ὅτι βασιλεὺς πάσης τῆς γῆς ὁ θεός,

ψάλατε συνετῶς.

₉ἐβασίλευσεν ὁ θεὸς ἐπὶ τὰ ἔθνη,

ὁ θεὸς κάθηται ἐπὶ θρόνου ἁγίου αὐτοῦ.

₁₀ἄρχοντες λαῶν συνήχθησαν μετὰ τοῦ θεοῦ Αβρααμ,

ὅτι τοῦ θεοῦ οἱ κραταιοὶ τῆς γῆς, σφόδρα ἐπήρθησαν.